MOSAGUBANG og dakong practical shooting competition sa umaabot ang Sugboanong sharpshooter nga si Roygbiv Barro sa iyang pagkahimong miyembro sa Laguna Practical Shooters Group (LAGPSG).
Matod ni LAGPSG president Alfredo Catalan Jr. nga ilang gikuha nga miyembro si Barro gumikan kay aduna kini dakong potensyal nga makahatag og dungog sa nasod.
Nidugang si Catalan nga dako sab og matampo si Barro sa ilang misyon nga mao ang pagtudlo sa batan-ong shooters aron mahashasan ang mga abilidad niini.
Gipasabot ni Catalan, kinsa usa ka shooting grandmaster, nga mas mabaid pa sab ang abilidad ni Barro sa iyang pagkasulod sa LAGPSG.
Sa iyang bahin, nagkanayon ang 19 anyos nga si Barro nga nagpasalamat siya’g dako nga nahimo siyang sakop sa LAGPSG nga gilangkuban sa labing maayong shooters sa tibuok nasod.
Si Barro mosalmot sa Lorenzana Cup karong Marso 5-8 sa T’boli, South Cotabato nga kabahin sa World Shoot Qualifiers.
Ang mga mananaog ning upat ka mga adlaw nga kompetisyon adunay poruhan nga mahimong sakop sa Philippine team nga makigtigi sa IPSC Word Shoot XIX karong Nobiyembre 28 hangtod Disyembre 5 sa Pattaya, Thailand. (ESL)