GIKAN sa usa ka parokya sa usa sa mga simbahan sa usa ka lalawigan si Padre Inocencio Almagre nga nahidagsa sa laing lalawigan ug siya nadestino sa usa ka parokya sa among lungsod sa San Fernando. May pipila pa ka buwan siyang nag-alagad sa among parokya sa San Isidro Labrador. Naukay ang kapupud-an sa iyang pamahayag nga iyang giutingkay ang mga butang mahitungod sa katapusang parokya nga iyang naalagaran.
Hilabihang sukoa sa mga parokyano nga iyang gitalikdan kaniadto lakip na ang katawhan sa lalawigan diin mismo ang lungsod ug barangay niini nahisakop. May dakong linog nga nahitabo sa lalawigan ug ang nahisugamak sa labing kadaot atua sa lungsod ug barangay diin nahimutang ang simbahan sa usa ka parokya nga naalagaran kanhi ni Padre Almagre. May nangamatay ug nangaangol sa nahitabong trahedya sa kinabuhi.
May mga reporter kun tigtaho sa mga mantalaan, radyo ug telebisyon nga nagbutyag sa mga pamahayag ni Padre Almagre ngadto sa publiko: “Mao na kanay silot sa Kahitas-an nga ilang nahiaguman karon. Halos silang tanan wala makaila sa gahom sa Diyos. Sila na mao ang mga diyos ug gamhanan. Nakay-ag ug nahalup-og ang tanang mga butang sa ilang dapit kay nagpuyo sila sa yawan-ong kinabuhi. Silutan gyud sa Diyos kadtong katawhan sa usa ka dapit din naghitak ang gidiling mga drugas ug nagpasuwabi ang lainlaing mga salaod.”
Nasuko ang gobernador, ingon man ang mga mayor sa mga lungsod ug dakbayan sa
nahisgutanng lalawigan. Namahayag ang mga opisyal sa lokal nga kagamhanan nga ingrato ug dili pari si Padre Almagre. Ug gideklarar nila kini nga persona non grata. Dili na nila ikahinangop ug dili na nila dawaton ang pagka tawo ni Padre Almagrre sa ilang dapit. Gani, may mga panghimaraot ug pagtunglo pa sila sa maong pari.
Peryodista ako ug magsisibya usab sa radyo. Nasayod ako kon si kinsa si Padre Almagre sa tinud-anay. Kauban kaming mga seminarista kaniadto. Apan mibiya ako sa seminaryo kay nahigugma ako sa usa ka babaye nga akong gipakaslan. Ang nahimo kong kapikas sa kinabuhi mao ang igsuon ni Padre Almagre.
Wala ibutyag ni Padre Almagre sa publiko ang mga hulga sa kamatayon. Giduol ug gisukot ko siya niini. “Sa didto ka pa sa ilang dapit, gibanhigan ka aron patyon, apan nabuhi ka ug nabalhin dinhi. Wala ka magpakahilom hangtod karon. Nganong dili mo na lang kalimtan ang tanan, Padre Almagre?”
May gisangpit si Padre Almagre sulod sa kubento ug migula ang mga linalang nga may mga diperensiya o baladado sa kalawasan. Nagliyok sila sa among atubangan.
“Mga parokyano ko sila sa dapit nga gibiyaan ko. Didto sila giabusahan sa mga pulitiko ug sa mga sapian. Nainutil sila kay gidagmalan sila. Sila midangop
kanako.Naghilak, nagpakiluoy kanako nga luwason ug sagupon sila nga mga kaabag sa simbahan ug kumbento. Mao nga dili ko mahimong kalimtan ang tanan bisan kutluon pa nila og usab ang akong kinabuhi!” (Katapusan)