BANSALAN, Davao del Sur -- Balor sa dul-an P1 milyones nga kantidad sa gituohang shabu ang nakumpiska atol sa hiniusang buy-bust operation nga gilusad sa kapulisan sa Magsaysay Municipal Police Station ug sa Philippine Drugs Enforcement Agency (PDEA) alas 5:25 sa hapon, Lunes, Pebrero 17, 2020.
Sa maong higayon, signit ang mga high-value target nga sila si Bangilista Naga Eson alyas Vhangs, 31, taga Datu Odin Sinsuat, Maguindanao, ug Clarrish Flores Orevillo alyas Kakay, 31, Balik-Islam nga taga Zapanta Village, Digos City.
Sumala ni Major Jeffmar Tercero, hepe sa Magsaysay police, nga gihimo ang hiniusang Oplan Double Barrel Reloaded sa Purok 2, Barangay New Opon sa lungsod kilid sa Davao-Cotabato National Highway.
Nakuha sa posisyon ni Vhangs ang usa ka jumbo pack ug usa ka gamay'ng sachet sa gituohang shabu ug usa ka kolor blue nga cellphone ug marked money nga P1,000.
Samtang sa posisyon ni Kakay, narekober sab ang usa ka large sachet sa druga, kolor itom nga cellphone, improvised totter nga gamit sa paghithit sa druga ug ang gimaneho niining Mitsubishi Lancer nga kotse.
Samtang gibutyag ni PDEA Provincial Officer Mildred Driz Romero nga nalista sa Directorate for Intelligence ang mga dinakpan.
Gibana-bana sa PDEA nga mobalor sa P960,000 ang kantidad base sa street market value sa narekober nga druga.
Sa pakighinabi sa Superbalita Davao, gilimod ni Vhangs nga sila maoy tag-iya sa druga sanglit gisugo lamang sila sa iyang amigo nga ihatud kini sa siyudad sa Digos ug adunay tawong mosugat kanila.
"Wala naman koy makuhang kuwarta ani kay human na man gipadala igo na lang ni ihatud," niya pa kinsa nagdumili paghatag sa ngan sa bagsakan sa maong shabu.
Gidala na sa PDEA-Davao office sa Davao City ang mga dinakpan alang sa pagduso sa kasong paglapas sa Comprehensive Dangerous Drugs Act of 2002. (Orlando B. Dinoy)