SUPERBALITA DAVAO

Nagbaboyan sa Magsaysay nanghinaut negatibo sa ASF 'sample' sa baboy

SunStar File

NAG-AMPO ang mga nanag-iya og baboy sa Barangay Poblacion sa Magsaysay, Davao del Sur nga negatibo sa African Swine Fever (ASF) ang gikuhang blood sample sa usa ka baboy nga namatay sa miaging semana.

Gibutyag ni Helen Carampatana, municipal agriculture officer, nga naghuwat pa sila sa resulta sa maong sample nga gipadala na ngadto sa Bureau of Animal Industry sa Quezon City sa kaulohang Manila alang sa eksaminasyon.

Matud ni Carampatana nga padayon ang hugot nga pagbantay sa Municipal Task Force (MTF) against ASF human namatay ang usa ka baboy sa ilang lugar.

Human gipatawag sa mga opisyal ang 100 ka hog raisers sa Barangay Poblacion niadtong Sabado, Pebrero 15, gipahimangnoan kini nga tumanon ang one kilometer radius protocol.

"As of now, we have initiated quarantine measures and lockdown was ordered in the Poblacion area," asoy ni Carampatana.

Bisan og wa pa maseguro nga ASF ang gikamatay sa maong baboy, mihimo na og kuwarentinas ang mga opisyal sa Municipal Agriculture Office isip depensa sa kagaw.

Gumikan niini wa nay baboy nga makagawas ug makasulod sa Poblacion kung way maipakitang dokumento ang tag-iya.

Si Lisa nga adunay binuhing baboy maoy usa sa mga nag-ampo nga mahimong negatibo ang resulta sa sample sanglit wa silay laing panginabuhian gawas sa pagbuhi og mga baboy.

Gimandoan sab ni Mayor Arthur Davin ang mga sakop sa MTF for ASF nga hugot i-monitor ang 22 ka mga barangay sa lugar.

Giangkon sa mayor nga makaapekto sa ilang panginabuhian sa mga molupyo ang ASF mao nga hugot gibantayan nga di makasulod sa lugar.

Padayon sab nga nagmuntar og checkpoint ang kapulisan sa tanang entradang bahin aron di makalusot ang mga baboy gikan sa ubang lugar.

Gihangyo sab ni Davin ang tanang hog raisers ug traders nga mohatag sa ilang kooperasyon aron mahimong malampuson ang kampanya batok sa ASF. (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph