NAGPATALA sa Talomo Police Station ang babaye nga alegasyong gibundak sa hubog nga American national ala 1 sa kaadlawon niadtong Lunes, Pebrero 17, didto sa usa ka imnanan sa Times Beach, Ecoland, Davao City.
Sumbong sa babaye nga si alyas Helen, 21 anyos, nga hilabihang kasakit sa iyang kalawasan dihang gibundak siya sa Amerikano nga miduol sa ilang lamesa.
Giingon nga nagtagay og ilimnong makahubog sila Helen uban sa ilang barkada dihang kalit mikaransa ang Amerikano ug miduol sa ilang tapok.
Walay duha-duha, giingon nga gialsa sa Amerikano si Helen, diin nalipay kini kay abi niya og halokan siya sa pag-alsa, dihang wala siya masayod nga nasuko na diay ang langyaw ug gibundak siya.
Nag-ugat kining tanan dihang giingon nagselos ang langyaw kay dunay katupad ang babaye nga lalaki ug sweet kaayo sila, apan dihang paglakaw sa lalaki, diha na nakahigayon ang langyaw sa iyang kalagot.
Ang reklamante ug ang langyaw dungan nga gipangdala sa kapulisan ug gimandoan sila nga maghusay sa didto sa barangay.