DUNAY plano ang Senado nga ibalik pagtudlo ang subject nga Good Manners and Right Conduct (GMRC) sa mga estudyante sa elementarya ug sa mga sekondarya.
Nindot ba kini?
•••
Dako ang kalainan sa mga estudyante karon ug sa kaniadto.
Ang pagsangpit og “good morning,” “good noon” ug “good afternoon” apil sa inadlaw nga mga isulti sa mga estudyante kaniadto. Apil na niini ang pagsulti og “thank you very much, Sir o Mam.”
Kaniadto, usa ra ka sulti sa maestro o maestra, wala nay daghang langas kay motuo man dayon ang mga estudyante.
Tungod niini, gamay lang sa mga ginikanan ang moapil sa paghimo sa mga homework o assignment sa ilang mga estudyante.
Apan karon, lahi na gyod.
Kasagaran sa mga estudyante, dili na gani moyanghag kon makasugat og tawo kay tua nas cellphone ang tanan nilang pagtagad. Nagtan-aw man tuod, apan dili makadungog o motagad kay dunay gipaminaw nga sonata sa ilang cellphone pinaagi sa headphone.
Panagsa na lang sa mga kabatan-onan karon ang mo-amen sa ilang mga ginikanan o kaha sa ilang mga paryente.
Gamay na lang sa mga kabatan-onan karon nga modungan og kaon sa ilang mga ginikanan kay busog pa o human na og kaon sa gawas. Kon modungan man gani, magkalingaw lang og gunit o tan-aw sa cellphone samtang magkaon.
•••
Unsa may hinungdan niini?
Daghan ang hinungdan.
Kaniadtong nanglabay nga mga panahon, simple lang ang panginabuhi og dili komplikado ang pagpuyo. Inig kahuman sa panihapon, mag-andam na dayon og para pangkatulog. Inig ka alas 8, pagngon na ang suga og mangatulog na ang tanang sakop sa pamilya. Kompleto na ang mga anak og serado na ang tanang pultahan.
Sayo sab nga momata og sayo nga mamahaw aron sayo sab nga makagikan padulong sa trabaho o sa eskwelahan. Mahabilin ang inahan nga mao ang moandam sa tanang kalihokan sa panimalay samtang mag-andam na sab sa paniudto ug sa panihapon.
Karong mga panahona, daw komplikado na ang panginabuhi. Daghan na og giatiman ang mga amahan ug inahan og gamay na lang og panahon sa ilang mga anak.
Pasagdan na lang ang helper nga maoy modigamo sa tanang kalihokan sa panimalay.
Dili na sab magdungan sa pagpangaon ang pamilya. Kasagaran, ang amahan og inahan na lang ang naa sa lamesa og usahay maapil ang kinamanghoran.
Lain-lain na sab nga sud-an ang kan-on. Kasagaran, mga “instant” nga mga pagkaon na lang o kaha, pinalit sa gawas kay apiki na kon magluto pa.
Human sa kaon, motan-aw sa TV o Neflix ang amahan, mag-facebook ang inahan, apil ang mga anak.
Gamay na lang ang panahon nga mag-estoryahanay ang mga sakop sa pamilya.
Kon mag-estoryahanay man gani, mahitabo lang kini kon dunay problema nga atubangon. Kasagaran nga mahitabo, isog na kaayo ang mga anak nga motubag-tubag sa ilang mga ginikanan, daw sa nasayod na silang tanan sa nahitabo sa kalibotan ug wala na magkinahanglan sa tambag sa ginikanan.
Bisan gani ang pagsul-ob sa bisti, daw sa wala nay control ang mga ginikanan. Pasagdan na lang ang ilang mga anak babaye nga mosul-ob sa pinaka-mubo nga shorts nga hapit na lang makita ang panty. Apil na niini ang paghikalimot sa disiplina sa ilang mga anak lalaki nga kasagaran dili na sila makahibalo sa mga barkada sa ilang mga anak.
Tungod niini, mobalik ako sa pangutana.
Husto ba kining plano sa Senado nga itudlo og balik ang GMRC sa mga kabataan?