MALINAWON tan-awon ang administrasyon ni Mayor Edgardo Labella sa dakbayan sa Sugbo. Apan kon atong palawman sa paglili, nag-umido ang kagubot, pareho sa bulkan diin wala kita masayod kon kanus-a mobuto tali sa iyang mga kaalyado nga opisyal.
Bisan kadtong wala modaug, mura sad og mga nakalingkod sa pwesto. Dili tiaw, daghang pang job order (JO) employees nga gipasulod, mas labaw pa sa nakuha sa naa sa posisyon. Gusto pang dunay regular sa posisyon. Dili kini maayong tilimad-on sa usa ka lider.
Nanag-iyahay lang og diskarte ang mga kaalyado sa mayor, matod pa. Dunay natudlo sa posisyon pero negatibo ang imahen sa nasayod sa iyang papalusot sukad pa niadtong sakop kini sa laing partido.
Kon mamati ka mga hungihung sa City Hall, tinuod man o dili, nagkalandras lang. Sumala pa, ang labing saba pa mao ang walay igong natampo sa partido sa miaging eleksiyon sa partido labi na sa pinansiyal nga aspeto.
Hinuon, dili kini ikatingala. Resulta kini sa traditional politics o trapo. Ang ilang personal nga interes mopatigbabaw human ang publikong posisyon giisip nga negosyo (korapsiyon).
Samtang, walay kuwestiyon sa kaligdong ni Labella apan, kon dili igmat ang iyang matag sa paglili sa diskarte sa mga kauban sa partido, hayan madaut ang iyang imahen ning sayo pa lang sa iyang termino sa katungdanan.
Maayong masanta sa mayor ang nag-umidong kahimtang sa ilawon ug pagpakanaug sa iyang bugtong tingog nga sundon ug kini lang ang tuhoan sa tanan.
Kita usab, katawhan, magbantay. Dili magpagamit sa nagpanguwarta luyo sa pagtukod og organisasyon o bisan unsa pang kalihokan o diskarte. Maayong masusi nato ang background o kasinatian sa nagtumaw nga lider o organizers.
Kay ang lungsuranon nga maalamon, yawe sa kalamboan.