ORMOC City, Leyte - Liboan ka mga rider gikan sa Luzon, Visayas ug Mindanao nagtapok ning dakbayan sa miaging semana aron pag-apil sa Ormoc AdvenTourAlly.
Matod ni Noel Casuco, organizer ug founder sa Eastern Visayas Motorcycle Club (EVMC), naa sa 1,300 ang nagparehistro sa kalihukan.
Ang Ormoc AdvenTourAlly gibahin sa duha ka mga kategoriya: riders nga milibot og 500 kilometros ug 1,000 kilometros.
Ang 500 kilometros milibot gikan sa Ormoc City paingon sa mga lungsod sa Northern Leyte, libot sa mga lungsod sa Eastern Leyte paingon sa Southern Leyte ug balik sa Ormoc.
Samtang ang 1,000 kilometros milibot gikan sa Ormoc, Biliran, Tacloban, mga lungsod sa Samar paingon sa Southern Leyte ug pabalik sa Ormoc.
Alas 12 sa kaadlawon, Sabado, Pebrero 15, 2020 mibiya sa Ormoc ang riders.
Nidaog sa 1,000 kilometros ang rider nga si Mark Anthony Boyo, taga Dakbayan sa Sugbo.
Nitala siya og siyam ka oras ug 51 minutos.
Siya nakabalik sa Ormoc alas 9 pasado sa buntag sa samang adlaw.
Si Boyo ang top 1 usab sa Cebu Endurance Challenge gamit ang iyang motorsiklo nga BMW.
Siya nagsugod sa pag-apil sa rides niadtong Hulyo 2019.
“Na overwhelmed ko kay wala ko ga expect kay first time ni nako diri sa Leyte and di ko kabisado kaayo sa mga agianan,” matod ni Boyo.
Kini ang hinungdan nga taas ang iyang oras kay kanunay siyang nasaag sa mga karsada.
Nagsunod kang Boyo mao ang taga La Paz Leyte ug miyembro sa EVMC nga si Raphy Marticio.
Si Marticio mitala og siyam ka oras ug 55 minutos.
“Proud gihapon kay sa kadaghan participants ang nag apil, nag second gihapon ko,” matod ni Marticio.
Samtang sa 500 kilometros, nag una ang apo ni Albuera, Leyte Sixto Dela Victoria nga si John Dela Victoria.
“Actually, certificate ra ilang makuha ani kay fun ride ra man ni siya,” matod ni Casuco.
Matod ni Casuco nga tulo ka adlaw ang maong kalihukan aron sab makasuroy suroy sa Ormoc ang mga rider ug dugang income kini para sa dakbayan.
Dominggo, Pebrero 16, ang katapusang adlaw sa kalihukan diin gipanghatag ang certificates. Dunay raffle ug mga kalingawan. (JKDP)