SUPERBALITA CEBU

2 patay sa pinusilay; taga Cebu City nasikop

PINUSILAY: Gisusi sa kapulisan ang dapit diin nahitabo ang pinusilay tali sa armadong grupo nga nagsakay og awto ug mga pulis nga nag-man og checkpoint sa lungsod sa Libertad, Misamis Oriental. (Hinatag sa Misamis Oriental Police Provincial Office)

USA ka pulis ug armadong tawo nangamatay samtang laing pulis ug usa ka sibilyan nangaangol sa pinusilay niadtong Lunes sa gabii, Pebrero 17, duol sa usa ka police checkpoint sa Libertad, Misamis Oriental.

Usa sa mga armado nasikop, taga Dakbayan sa Sugbo.

Mga imbestigador nagsuso sa mga kalihukan sa armadong mga tawo, kinsa nasakpang naghupot og daghang mga armas ug sachet sa gituohang shabu. “Gi-determine pa nato ang ilang grupo tungod sa magnitude sa ebidensya,” matod ni Misamis Oriental Provincial Police Director Colonel Robert Roy Bahian.

Napatay mao sila si Staff Sergeant Ronald Caayupan ug usa sa mga suspek nga giilang si Jephone Tinamisan, 33, taga Ozamiz City.

Nangaangol mao sila si Chief Master Sergeant Fernando Maestrado ug usa ka babayeng sibilyan nga nagpuyo duol sa dapit diin nahitabo ang engkwentro dihang siya naigo sa saag nga bala nga gituohang gikan sa mga suspek.

Si Bahian niingon nga ang pinusilay nahitabo human ang lima ka armadong mga tawo nga sakay sa puti nga Mitsubishi Mirage namusil sa pito ka mga pulis nga nagbantay sa checkpoint sa national highway sa Poblacion, lungsod sa Libertad.

Si Caapuyan nakaangkon og samad pinusilan sa wala nga dughan samtang si Maestrado naigo sa wala nga tiyan. Matod ni Bahian nga ang ang armadong mga tawo nipasirit sa pagpadagan ug nipadung sa taytayan sa pagbawos sa mga pulis.

Naigo si Tinamisan ug namatay. Laing suspek, nga giilang si Richard Son Perez, nasikop sa hot pursuit operations sayo sa Martes. Laing tulo ka armado nakaeskapo.

“After nila pusil sa mga police, nagdungan sila og gawas ug niadto sa tulay ug niambak. Napatay ang usa sa suspek ug nadakpan ang isa nga napiang after niambak,” matod ni Bahian.

“Naay civilian nadaplisan pero stable na ang condition posible gikan to sa mga perpetrators kay makita sa trajectory,” dugang niya. Si Perez, 31, taga Cebu City, nabilanggo karon ug mag-atubang og kaso.

Siya nanghimakak nga duna siyay kasayuran sa mga armas nga napalgan sa sakyanan.

“Gitawagan ko kay naa daw mi adtoon sa Tubod, Lanao. Wala ko kabalo anang mga armas,” matod ni Perez.

Mga imbestigador nakakuha og MK4 Colt pistol, kalibre .45 nga pistola, Intratic 9mm Luger Tec KG9 pistol, Armscor 9mm, Kimber Ultra Carry, upat ka fragmentation grenades ug nakabuto nang mga bala, gawas sa gituohang shabu.

Matod ni Bahian nga armadong grupo nagbiyahe gikan sa Cagayan de Oro padung sa Lanao dihang nasum-ok sila sa mga pulis. (SunStar Cagayan de Oro)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph