MGA motorsiklo ug bisan mga sakyanan nga hinay ang padagan ang gipahinumduman nga anha moagi sa outer lane sa Cebu South Coastal Road (CSCR) o mas naila nga South Road Properties (SRP) road sa habig sa dakbayan sa Talisay.
Kon dili motuman sa maong traffic rules makadawat og citation ticket ang maong driver sa kalapasan sa ‘obstruction’ sa dagan sa trapiko nga adunay multa nga P500 ngadto na sa P1,000.
Gitug-an ni Jonathan Tumulak, pangulo sa City of Talisay Traffic Operations Development Authority (CT-Toda) nga anam na nilang gipahugtan ang pagpatuman sa mga City ordinance, ilabi na kalabot sa trapiko. Usa kini sa ilang nakita nga makatabang pagsulbad sa paghuot sa trapiko ilabi na dinha sa CSCR.
“Gi-implement na gyud nato nga anha sa outer lane pa-agion ang mga slow moving nga sakyanan like motor. Paglikay na kanila sa disgrasya ug aron mapaspas ang dagan sa trapiko. Naa na siya sa RA 4136 sa traffic code ug sa Talisay city ordinace, strict implementation lang ta,” pasabot ni Tumulak.
Gisugdan sa pagpahibalo ug pagpatuman sugod na karon, gani aduna na silay mga motorista ang na-isyuhan og citation.
Aron sa pagpahinumdom gyud sa mga motorista ang Talisay City government ang nipahimutang sa mga traffic enforcer sa kada intersection diha sa CSCR nga nagdalag megaphone, pagpahinumdom sa maong balaod.
Panghinaot nila nga sa maong pagpatuman sa mga traffic rules, kaminusan ang aksidente sa kalsada. (FMD)