DUL-AN 3,500 ka mga pamilya ang natabangan sa Cebu City Government sulod sa unang walo ka buwan sa pagpangatungdanan ni Mayor Edgardo Labella niadtong mga namatyan.
Base sa record sa Burial Assistance Office (BAO), adunay 2,929 ang nahatagan og tag-P10,000 gikan sa buwan sa Hulyo hangtod Disyembre tuig 2019 ug laing 500 ang nahatagan sa buwan sa Enero ug Pebrero karong tuiga.
Sa unom ka buwan, naka-atiman sila og 2,234 ka mga aplikante kinsa gusto nga mo-avail sa maong hinabang gikan sa siyudad.
Si Andy Borres, pangulo sa BAO nagkanayon nga ang buwan sa Agusto maoy labing daghan og financial assistance nga ilang na-release nga naabot sa 1,010 ka mga pamilya ang nakakobra og financial assistance.
Ang buwan sa Septiyembre maoy labing ubos sa ilang releasing nga aduna lay 250 ug iyang gipasabot nga natingob sa Agusto ang mga pending sa nakalabay nga administrasyon.
Si Borres nagkanayon nga kadto lang mga botante sa Cebu City ang makapahimulos sa maong burial assistance apan sa bag-ong executive order ni Labella, mahimo nang makakuha ang pamilya sa mga menor-de-edad nga mamatay, kadtong mga detainees o inmate ug kadtong nalisuan sa ilang mga pangisip.
Ang mga claimant kinahanglan nga sakop sa pamilya o immediate family sama sa asawa o bana sa namatay, anak nga nag-edad og 18 anyos pataas o igsuon sa namatay.
Ang Cebu City Government nigahin og P50 milyones para sa tuig 2020 ug matod pa ni Borres nga P5 milyones pa ang naiban sa maong pundo alang sa unang duha ka buwan. (PAC)