GIBUTYAG sa Department of Interior and Local Government sa dakbayan sa Lapu-Lapu DILG nga adunay katungod ang mga konsehal sa dakbayan sa paghimo ug grupo o asosasyon sama sa Barangay Councilor’s League of the Philippines BCLP ubos sa local government code.
Mao kini ang tubag ni Jonah Pino dihang nahinabi ning mantalaan kalabot sa isyu sa pagtukod BCLP sa dakbayan nga una nang gikwestyon ni Lapu-Lapu City Mayor Junard “Ahong” Chan.
Apan giklaro usab ni Pino nga kung balido ba o dili ang pagkatukod sa naasoyng grupo dili na siya makasulti niini.
Sanglit ang legal department na sa ilang ulohang buhatan ang mosusi kalabot niini.
Kini human nga adunay usa ka barangay konsehal sa dakbayan ang mipadangat ug pormal nga reklamo sa DILG Lapu-Lapu City nga nagkwestyon sa validity sa grupo.
Gihimong grounds sumala pa sa suwat nga nadawat sa buhatan ni Pino mao ang walay quorom atol sa piniliay diin moabot lang sa 160 ang motunga sa piniliay samtang adunay 210 ka mga barangay konsehal sa dakbayan.
Matod ni Pino iyang iduso ang suwat reklamo nga iyang nadawat ug ang legal department na sa kaulohan maoy motimbang-timbang sa ilang baroganan sa naasoyng isyu.
“We are also requesting guidance sa legal, our legal department will answer those queries unya mao nay ihatag namo nila base sa ilang pangutana, actually other local government unit have also organized their respective leagues so dili na ni siya bag-o,” matod ni Pino.
Ang BCLP sa dakbayan sa Lapu-Lapu nanumpa na isip grupo niadtong miaging Biyernes Pebrero 14 nga gipangulohan sa ilang presidente nga si Arvin Abing sa Barangay Maribago.
Si BCLP national president Tito Espiritusanto ug Kongresista Paz Radaza sa lone district sa dakbayan ang nagpapanumpa sa grupo. (GCM)