MIABOT sa kapin sa 16,000 ka tawo ang natala sa Cebu City Transportation Office (CCTO) nga nakalapas sa jaywalking sukad niadtong Enero 1 hangtod Pebrero 14, 2020.
Kini labaw pa sa niaging 2019 sa susamang mga bulan nga adunay natala nga 3,074.
Sumala pa sa hepe sa CCTO nga si Erwin Navales, nga sagad sa mga violator naggikan sa kalsada duol sa Metro Colon.
Samtang ang uban nasikop sa kadalanan sa habig sa Robinsons Fuente, SM Mabolo, Gaisano Capital, 138 Mall, ug Colonnade.
Sa miaging buwan, nadakpan sa mga traffic enforcer ang 11,072 ka mga tawo, samtang adunay 5,176 ka mga nadakpan sa tunga-tunga ning buwana.
Kini tungod sa hugot nga pagtuman sa City Ordinance No. 1814 kon “Anti-Jaywalking Ordinance.” Giingon ni Navales nga kadaghanan sa violators naggikan sa mga probinsya nga wala masayod sa maong lagda samtang ang uban nagmagahi sa paglabang gamit sa pedestrian lane.
Nagkanayon ang maong opisyal sagad sa mga disgrasay mahitabo gumikan sa pagpataka og labang.
“Ang pagbuhat sa City Ordinance, for safety man gud na nila para dili sila ma disgrasya,” sigon ni Navales.
Dunay duha nga kapilian ang matag indibidwal nga madakpan, kini ang pagbayad og P50 o ang pagpa-ubos sa community service.
Suma pa ni Navales, sa dili pa nila i-release ang mga nadakpan nga mobayad og multa, ilaha kining pahinumduman kabahin sa maong lagda.
Ang katong mopili sa community service, ila kining idukaron og upat ka oras usa sila manglimpyo kun manilhig sa gawas sa opisina sa CCTO.
Giklaro ni Navales nga dunay mga exemption niini sama sa mga senior citizens ug mga buntis nga kinahanglang adunay mogiya.
Lakip na usab niadtong mga nagdali kay adunay emerhensiya sama sa dinali-an nga pagpalit og tambal, apang gikinahanglan nga makapakita og ebidensiya sama sa resita ug uban pa. (Mae Fhel Gom-os, USJ-R Journalism Intern)