DI PA makatuo ang pamilyang Gestopa sa trahedya nga nasugatan niadtong sayong buntag sa Lunes, Pebrero 18, 2020.
Nakalas ang duha ka mga kinabuhi sa duha ka ulo sa pamilya nga sila si kanhi judge Gerardo Gestopa Jr., 68, ug asawa niini nga si Louella, 67.
Ang ilang apo nga si John Jeric Gestopa-Suson, 21, kinsa adunay deperensya sa pangisip, nagpabling missing.
Ang anak ni Judge Gestopa nga si Gerlou Gestopa-Tibon, niingon nga naabot ang iyang ginikanan niadtong Enero 27, 2020 gikan sa ilang usa ka buwan nga bakasyon sa New Zealand kon diin nagpuyo ang uban niining mga anak.
“Ako may nagkuha nila sa airport. Murag kato nga ilang last nga trip nga last na gyud diay to nila. Akong gipangutana ako papa how was it? Nya niana siya nga the best ever gyud to niya nga vacation nga as in lipay gyud kaayo siya,” asoy ni Gerlou.
Niadtong Pebrero 17, Lunes, sigon ni Cesar sa wa pa ang sunog nangatulog ra sila ug sa dihang nisinggit ang ilang mga silingan nga adunay sunog, nagdinaganay na sila paingon sa gawas sa balay.
Nangita si Gerardo kang Jeric.
Sigon ni Cesar nga gisigehan nila og ingon si Gerardo nga gidala na sa yaya niini, apan wa mopatuo ug nidagan pabalik sa sulod nga way pagduha duha.
Human nakita nga mibalik ang iyang bana pagsulod, niapas sab si Louella.
Sigon ni Cesar nga pinangga sa managtiayon si Jeric tungod kay kini ang una nilang apo. Ang magtiayan sab ang nagpadako ug nag-atiman ni Jeric.
“Tingalig gitago to sa iyang guardian angel or gitabangan to,” asoy ni Cesar.
Si F/Insp. Kyle Byran Lauzon, deputy fire marshall sa Mandaue City Fire Station, niingon nga hangtod sa oras paghinabi niini sa Superbalita Cebu, wa pa nila makit-i ang lawas ni Jeric.
Giukay na sa kabomberohan sa Dakbayan sa Mandaue ang matag suok sa mga nasunog nga balay apan wa gihapon kini makuha.
Ni-request si Lauzon sa Bureau of Fire Protection ug sa Philippine COast Guard og K9 unit nga makatabang nila sa pagpangita sa lawas ni Jeric.
“Ang probability, kon atong isabak ang iro ngadto kay very low kay wala naapil sa ilang gi-train ang scent of flesh,” sigon ni Lauzon. (KFD)