GIPASAKAAN nag kaso sa mga sakop sa Regional Anti Cyber-Crime Unit 7 ang doktor sa mata nga giingong ni-post og fake news labot sa giingong pagkamatay sa usa ka langyaw sa novel coronavirus samtag nalandig sa usa ka pribadong tambalanan sa Dakbayan sa Mandaue.
Ang gipasakaan og kaso mao si Dr. Josephil Brian Consuelo, hingkod, taga sitio Nivel Hills, Barangay Lahug, Siyudad sa Sugbo.
Ang gipasaka kaniya mao ang Unlawful use of means of publication and unlawful utterances sa Article 154 sa Revised Penal Code in relation sa Section 6 sa Republic Act 10175 kun” committed through and with use of information and communication technology.”
Matod ni Police Colonel Marlo Castillo, hepe sa RACU 7, nga ang mga ebidensya nga ilang gisukip sa information mao ang affidavit sa iyang sakop, blotter sa police station, screen shots sa nag viral nga Facebook post sa doctor, online investigation report, certification sa tambalanan ug validation report. (AYB)