SUPERBALITA CEBU

SK chairman, papa sikop sa pulis

SANGGUNIANG Kabataan (SK) chairman sa Lawaan III, iyang amahan nga kanhi chief tanod nasikop sa buy-bust ug raid sa ilang balay tungod sa giingong kalambigitan sa pagpamaligya og ginadiling drugas, Miyerkules sa kaadlawon, Pebrero 19.

Samtang usa usab ka durugista napatay human nisukol sa kapulisan sa Talisay.

Laing 12 pa ka mga gitudlong mamaligyaay nadakpan atol sa sunod-sunod nga pagpatuman sa upat ka search warrants ug buy-bust sa Barangay Lawaan III.

Giila ang dinakpan nga sila sila si Guendolyn Tavera Luage, SK chairman sa Lawaan III ug amahan ga si Francisco Luage, kanhi chief tanod sa barangay.

Si Francisco mao ang amahan sa napatay sa miaging tuig nga giingong drug lord nga si Girlie Luage.

Si Girlie gitumbok nga maoy nipuli sa laing giingong drug lord nga si Steve Go, kinsa gipatay sud sa Mandaue City Jail.

Matud ni Police Major Gerard Ace Pelare, hepe sa Talisay City Police Station, usa mga subject nila si Francisco sa buy bust.

Gawas sa buy-bust, nalutsan usab kini og search warrant.

Gihimo ang operasyon mismo sa balay sa mga Luage mga ala 1:15, Miyerkules sa kaadlawon.

Nakaeskapo ang umagad ni Francisco nga si Anna Fe Abrenica. Si Abrenica asawa ni Girlie.

Si Francisco nasikop niadtong Hulyo, 2019, apan naka-avail sa plea bargaining agreement.

Apan matud ni Pelare nga base sa ilang intelligence monitoring, nga sukad buhi pa si Girlie, ug bisan sa kamatayon niini ug hangtud gawasnon pagbalik si Francisco, way hunong ang pamilya sa illegal drug trade.

Samtang nasuta usab sa kapulisan nga si Guendolyn, sa buhi pa ang maguwang nga si Girlie, giingon nga kini collector sa mga halin sa drugas.

“Nagsige na gyud ni sila, wala silay hunong but nihinay lang ang ilang baligya unlike sa buhi pa si Girlie. Pero sila ang nipadayon sa nabiyaan ni Steve Go ug ni Girlie. Maka-dispose sila nalang per week og P200,000 worth of drugs,” saysay ni Pelare.

Nakuha gikan sa balay sa mga Luage ang P612 nga balor sa gituohang shabu. Dugang ni Pelare nga ang pamilya tigsuplay sa ilegal nga drugas sa Mananga, Barangay Tabunok.



Nanghimakak

Hugot nga gihimakak ni Francisco ang pagkalambigit niya ug ilabi na sa iyang anak nga si Guendolyn sa illegal drugs.

Matod sa amahan nga anak tuod niya si Girlie, apan way lain sa iyang kabanay ang namaligya o nalambigit sa ginadili nga drugas.

Labaw na ang anak niini nga usa ka SK chairperson.

Panalipod sa amahan nga tarung nga pagkaanak si Guendolyn, diha sa pagpanerbisyo ug nga nagtrabaho sa usa ka daku nga kompaniya.

Gitug-an ni Francisco sa mga tigbalita nga igo ra sila gituktok sa ilang balay sa nagpaila nga mga pulis.

Gikapkapan siya ug giingong walay nakuha gikan nila.

Natinga na lang sila kon asa gikan ang gipakita nga gamay’ng pinakete sa shabu nga giingong ila.

“Walay si bisan kinsa sa ako pamilya nga na-involve sa drugs. Buotan kaayo na ako anak, (si Guendolyn), tinarong nga nagtrabaho ug nagserbisyo,” saysay ni Francisco.

Giangkon hinuon niini nga nagpaabot nalang siya nga mahuman ang dugang usa ka bulan sa iyang pagka probationary, human ni-avail sa plea bargaining agreement.

Si Guendolyn wa na niatubang pa sa mga sakop sa media.

Ang duha og laing 12 ka dinakpan napriso sa Talisay City Jail ug gikatakdang pasakaan og kaso.

Apan sa wa pa ang dakop sa mag-amahang Luage, unang gipaubos sa search warrant ang laing mamaligyaay sa mga Luage nga si Gilbert Campo, alas 12:58 sa kaadlawon.

Apan giingon nga nisukol si Campo hinungdan nahitabo ang pinusilay ug napatay ang suspek.

Si Mayor Gerard Anthony Gullas Jr. nasubo nga lakip ang usa ka SK chairperson nasikop sa subsob nga anti-drug operation sa Lawaan 3.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph