GI-AGHAT sa hepe sa Police Station 2 (PS2) sa Cogon ang katawhan nga mo-report mismo kaniya kung dunay nasayran nga sakop niini nga pulis nga abusado ug nalambigit sa pagdawat og kotong gikan sa ilegal nga kalihokan sa ilang area.
Gibutyag ni Police Captain Ernesto Sanchez nga sa pagkakaron, wala kini nadawat ang report kalabot na sa mga personahe sa Cogon nga nalambigit sa mga ilegal nga kalihokan.
Nasayran nga gipanghingusgan karon sa otoridad ang kamandoan ni Philippine National Police Chief Archie Gamboa nga "no take policy" sa kapulisan, diin hugot gyud nga gipanghingusgan nga dili malambigit ang kapulisan sa korapsiyon o pagdawat gikan sa mga ilegal nga kalihokan.
"Gi-awhag nato ang katawhan nga they have to report secretly, naa tay panghatag nga hotline, ug ako mismong number 0917-818-4685,ato silang tabangan dili nato ibulgar ilang pangalan," matud ni Sanchez.
Gihagit usab niini ang kapulisan nga sakop niini nga ipatuman kini nga kamandoan.
Tungod niini, dali nga mohimo sa ilang trabaho ang kapulisan kong wala nahikot kang bisan kinsa
"Ato silang gihagit nga i-implementar gyud ni. They have to embrace this program of our chief PNP tungod kay usa pud ni siya nga makatabang sa ato kay we can easily dispense our justice kung dili ta beholden to somebody," dugang pa.
Gipasalig usab niini nga mag-imbestiga kung ugaling dunay madawatang mulo batok sa pulis labi na sa Cogon area nga diin dako kini nga lugar ug susamang daghang mga tentasiyon.
Ang makalapas niini nga sakop sa kapulisan mag-atubang og kasong administratibo ug kriminal.