PATAY ang usa ka pulis ug usa ka lalaki atol sa pinusilay nga nahitabo sa checkpoint mga alas 8:39 sa gabii adlawng Lunes, Pebrero 17, sa National Highway sa Barangay Poblacion, lungsod sa Libertad, Misamis Oriental.
Sa imbestigasyon, nasuta nga ang mga personahe sa Libertad Police Station sa direktiba ni Police Captain Rham L. Camelotes nagpahigayon og checkpoint nga gilangkoban nila ni Police Chief Master Sergeant Fernando Maestrado ug Police Staff Sergeant Ronald Caayupan.
Atol sa checkpoint, lima ka mga lalaki nga sakay sa kolor puti nga Mitsubishi Mirage nagdala sa plaka nga BO J805 ang kalit lang nga namusil ngadto sa mga Police Officers.
Nakasukol pa ang maong mga polis ug nakabalos, hinungdan usa sa suspetsado, nga uwahing naila nga si Jephone Fabriga Tinamisan, 33, taga Prk-5, BaƱadero, Ozamis City, ang naigo ug nakabsan sab sa kinabuhi.
Tungod sab sa insidente, usa ka sibilyan ang naangin nga giilang si Gemma Patlunag, kinsa naigo sa stray bullets.
Si Maestrado naigo deretso sa iyang paa, samtang si Caayupan naigo sa iyang wala nga bahin sa dughan. Gipangdala kini sila sa Misamis Oriental Provincial Hospital sa Initao apan nakabsan sa kinabuhi si Caayupan.
Sa crime scene ug pagsusi sa Scene of the Crime Operatives (Soco), narekober ang sakyanan sa mga suspek lakip ang nagkadaiyang armas sama sa usa ka MK4 Colt Series 80, Norinco 1911A1 caliber .45 ACD, Intratic Miami FL 9MM Luger MOD TEC KG9, FCC caliber .45 MM, KG99 caliber .9MM Luger, Kimber Ultra Carry caliber .45, Armscor 9MM, ug upat ka mga fragmentation grenade.
Nakarekober sab ang Soco team gikan sa napatay nga suspek og lima ka mga gagmayng pakete sa gitouhang shabu ug karon anaa na sa kostudya sa Regional Crime Laboratory Unit.
Sa padayon nga hot pursuit operation kagahapon sa alas 6:50 sa buntag sa Pebrero 18, laing suspek ang nadakpan nga giilang si Richard Son Perez, 31, taga Bangkal, Mahayahay, Cebu City, ug kasamtangang nagpuyo sa Barra lungsod sa Opol, Misamis Oriental ug karon detinado na sa Libertad Police Station.
Si Police Lieutenant Colonel Mardy Hortillosa, ang tigpamaba sa Police Regional Office-Northern Mindanao, niingon sa Superbalita Cagayan de Oro nga ang tulo ka mga nakasibat nga mga lalaki posibleng anaa lang sa vicinity sa Misamis Oriental ug karon mao ang gipangita.
Dili pa usab mabutyag ang ilang background karong panahona.
Gikasubo sab og dako ni PRO-Northern Mindanao Director Rolando Anduyan ang pagkamatay ug pagkaangol sa iyang mga sakop.
Gibutyag niini nga sa matag operasyon, dili malikayan ang mga susama nga insidente ug niawhag sa kapulisan nga magbinantayon sa kanunay.
"In police operations, there is no perfect execution and the danger is always there to our personnel, that is why there was an incident like this. But the command will always remind them to be always vigilant and security conscious," matud ni Anduyan.
Gipaabot sab niini ang iyang dakong pahasubo sa pamilya.
Gihangyo niini ang katawhan nga kung adunay na monitor nga mga kadudahan i-report dayon sa labing duol nga presinto.