LALAKING patay na napalgan sa Sitio Campo 5, Barangay Manipis, siyudad sa Talisay kagahapon, Miyerkules sa buntag, Pebrero 19.
Hangtud ning pagsulat, matud ni Police Major Gerard Ace Pelare, hepe sa Talisay City Police Station, nga wala pa mailhi ang lalaki.
Nakadawat ang ilang buhatan og tawag gikan sa nagpakabana nga residente sa Campo 5, 7:30 sa buntag adunay lalakei nga gihulog sa itom nga sakyanan sa daplin sa dan. Dayon nadungog na dayon ang buto-buto sa armas. Nipasutoy usab dayon og padagan ang sakyanan.
Diha na nakita ang lalake nga nagbuy-od na. Dali usab unta nitawag og emergency team ang mga residente, apan sa pag-abot sa Talisay Response Emergency Action Team (TREAT), nakabsan na sa kinabuhi ang biktima.
Matud ni Patrolman Milfred Labitad, imbestigador sa Talisay City Police Station, giban-bana nga 30 ngadto sa 35 anyos ang lalake.
Nga adunay gitas-on nga mga 5’7, medium build ang panlawas ug taas ang buhok.
Hubo ang pang-taas nga bahin sa biktima, apan adunay senina nga blue nga gitaptap sa iyang mga mata ug dagway.
Nagsul-ob kini og karsones nga blue ug nga nagsapatos.
Dugang ni Labitad, duna silay nakuhang upat ka gagmay nga pakete sa gidudahang shabu sa bulsa sa karsones niini.
Tulo ka samad pinusilan sa iyang buko-buko ang naangkon sa biktima.
Padayon ang kapulisan sa pagsusi krimen ug nagpaabot nga dunay moila niini. (FMD)