LAWAS nga gituohang iya ni John Jeric Gestopa-Suson, 21, napalgan sa pansayan sa ikaduhang andana sa balay nga nasunog niadtong Lunes sa kaadlawon, Pebrero 17, 2020.
Si Jeric missing sukad niadtong Lunes human sa sunog sa Zamora st., Barangay Centro, Mandaue City nga nipatay usab sa iyang mga apohan nga sila si retired Judge Gerardo Gestopa, Jr., 68, ug asawa nga si Louella, 67.
Sigon ni Mandaue City Deputy Fire Marshal Kyle Bryan Lauzon nga mga alas 2:25 sa hapon nakit-an ang lawas sa usa mga lumulopyo nga ningtabang og pangita.
Ang lawas nahikit-an sulod sa comfort room nga anaa sa tumoy sa ikaduhang andana sa tulo ka andanang balay.
Dali-dali nga niabot ang Scene of the Crime Operation (SOCO) sa lugar aron sutaon ang lawas.
Gituohan nga si Jeric nangitag lugar nga bugnaw gikan sa kayo nga nagdilaab na niadtong higayuna.
Matod ni Lauzon nga wa mabungkag ang lawas ni Jeric, apan lisod kining makit-an kay natabunan sa mga abo.
Pasabot niya nga dili pa nila madeklarar nga ang lawas iya ni Jeric sanglit kani i-autopsy pa bisan kon wa nay laing gideklarar nga missing.
Ang magtiayong Gestopanakagawas na sa nagdilaab nga balay, apan nibalik pa sa pagsulod sa pagkahibawo nga anaa pa ang ilang apo sa balay.
Laing lima pa ka mga balay sulod sa compound sa Ermac-Gestopa naapil sa sunog. (JCT)