TULO ang kumpirmadong namatay sa bangga tali cargo truck ug van niadtong Martes mga alas 11:55 sa buntag sa Sitio Dupol, Barangay Bagumbang, Bonifacio, Misamis Occidental.
Sa imbestigasyon sa Bonifacio Police Station, ang insidente gilambigitan sa usa ka cargo truck nga gimaneho ni Erick M. Conja, 35, residente sa susamang siyudad, tali sa usa ka Toyota Hi Ace Van gimaneho sab ni Cris A. Brillo, residente sa susamang dapit.
Nasuta sa imbestigasyon nga tabo kining duha ka sakyanan apan kining cargo truck kalit mi-overtake sa nag-una nga motorsiklo, hinungdan sa maayong pagkaigo niini sa kilid nga bahin sa van nga maoy hinungdan misarasay kini paingon sa kilid nga bahin sa dalan.
Sa kusog nga impak, di tiaw ang kadaot nga naangkon sa mga biktima kon hain usa ang dead on the spot nga giilang si Gerlie J. Abing, taga Pagadian City, ug duha ka mga pasahero ang gideklarar nga dead on arrival kinsa giila nga mao sila si Marlon Murcilla Benitez, 26, teller sa Palawan ug taga Barangay Lower Pingkian, Pitogo, Zamboanga Sibugay, ug si Daylinda C. Lapinig, taga Barangay Kulisap, Payao, Zamboanga Sibugay.
Unom ka mga pasahero ang gidala sab sa balay tambalanan nga giilang sila si Theresa Lasaca, Mark Cesar Borja, Rhiana Marie Ebcay, Danilo Balumaaga, Fredo Villamor, ug Parami Ebcay.
Ang maong mga driver ang gidala na sa istasyon sa kapolisan.
Si Police Colonel Danildo Tumanda, ang director sa Misamis Occidental Police Provincial Office, nagpahimangno sa kapulisan nga padayon sa paghatag og impormasyon kalabot sa safety driving tips aron malikayan kini nga matang sa insidente.