DAKPAN sa kapulisan ang usa ka lalaki nga misuway og kidnap sa 2 anyos nga batang babaye kagahapon, Pebrero 19, 2020 sa Purok 13, Poblacion Valencia City, Bukidnon.
Ang suspetsado giilang si Eric M. Cabrejas, residente sa susamang barangay.
Sa imbestigasyon ni Police Lieutenant Colonel Surki Sereñas, ang hepe sa Valencia City Police Station, nasuta nga kining 2 anyos nga bata anaa lamang sa terrace sa ilang puloy-anan nga namahaw.
Ang inahan sa biktima nisulod lamang sa ilang puloy-anan aron mokuha og tubig apan pagbalik niini, maoy iyang nadiskubre nga wala na iyang anak ug nasuta nga gikuha diay sa suspek.
Nakita sa inahan nga misuway og sibat ang suspek dala iyang anak, hinungdan nga nagpatabang kini sa kapulisan ng miresulta sa pagkasikop niini.
Matud ni Sereñas nga gisuwayan pa og haylo sa suspek ang bata og kendi nga nakuha gikan sa kamot sa bata.
Dugang ni Sereñas sa Superbalita Cagayan de Oro nga nagpabuang-buang ang suspek dihang ila kining giimbestigar ug gipangutana apan nakuha gikan sa posisyon niini ang iyang identification card, marriage contract, cedula (2017, 2018 ug 2019) ug uban pa nga dokumento.
Giawhag karon ni Sereñas ang mga nabiktima niini nga mopasaka og sumbong batok sa suspek kay basin dili lang kini ang unang higayon nga misuway kini sa pagpangdagit og bata gawas pa nga giangkon niini nga gapangawat sab kini.