NADISKOBRE sa team sa Road Clearing Operation ug kapulisan ang ubay-ubay ka mga galon sa diesel atol sa clearing operation sa usa ka junkshop sa National Highway sa Barangay Tablon, siyudad sa Cagayan de Oro.
Mga 20 ka galon nga dunay sulod sa giingong diesel ang ilegal nga gipundo nga nadiskobre sa clearing team, rason nga gi-operasiyonan usab sa kapulisan sa Police Station 10 (PS10) sa Cugman.
Gibutyag ni Antonio Resma Jr., focal person sa composite team, nga samtang padayon nga nagpahigayon sa maong operasiyon ug nadiskobre niini ang maong ginalon nga mga diesel.
"Ongoing road clearing operation at Tablon junkshops along National Highway. We discovered barrels of diesel inside the makeshift shafts," matud ni Resma.
Gidugang pa niini nga posibleng ilegal nga gipalit ug gibaligya kining maong ilang nadiskobre nga mga galon nga dunay sulod nga diesel.
"Yes, most probably illegal ga baligya or bawal man gihapon mag storage og flammable, and sa dili authorized na containers," dugang niini.
Sa pagsulat niini nga balita, kasamtangang gidala na sa buhatan sa kapulisan ang maong mga ginalon nga diesel.