NALIGO og gasolina ug nagsunog sa iyang kaugalingon ang usa ka lalaki tungod kay dili na makigbalik ang kaipon niini niadtong Pebrero 19 sa kaadlawon sa usa ka barangay sa siyudad sa Cagayan de Oro.
Samtang nagdiliab ang kalayo sa lawas, nangayo og tabang ang 32 anyos nga lalaki ngadto sa iyang kaipon nga 22 anyos.
Sa pagdagan-dagan sa maong lalaki, nahulog kini sa atabay ug swerte nga napalong ang kalayo.
Ang 22 anyos nga kaipon niini sulod sa tulo ka tuig nagpatala sa kapulisan ug gitaho ang nahitabo nga pagsunog sa lalaki sa iyang kaugalingon.
Nasayran nga nakigbulag kining babaye niadtong bulan sa Disyembre 2019 tungod kay dili na makasabot sa batasan sa lalaki kinsa magsige na lang og selos.
Hinuon, gibutyag sa babaye nga dili kini manapat kaniya apan magsige og lasong.
"Naglasong siya, nagsunog siya og gasolina sa iyang kaugalingon. Di na gyud nako na pasayloon kay kaupat na niya gibuhat nga maglasong," matud niini.
Gibutyag usab sa inahan sa babaye nga ikaupat na ka higayon nga naglasong ang maong lalaki diha sa ilang panimalay, hinungdan nga dili na nila kini mapasaylo.
Dali usab nga gidala sa ospital ang lalaki aron matambalan ang mga naangkon nga mga paso labi na sa tiil, buhok ug sa iyang kamot nga bahin.