DAGHAN ang niduso nga himuong legal ang medical marijuana. Usa na niini ang Philippine Cannabis Compassion Society (PCCS), nga nangusog nga mapasar ang House Bill No. 279 nga maghimong legal sa medical marijuana.
Kon mahimo kining balaod, mahimong kapahimuslan ang therapeutic uses sa marijuana o cannabis niadtong nag-antos sa chronic o debilitating medical conditions apan mag-agi kini sa mga S-3 licensed doctors ug pharmacists.
Si Dr. Donnabel Cunanan, usa ka dentista ug founding member ug tigpamaba sa PCCS, niingon nga maalibyohan ang pag-antos sa mokabat sa 250,000 ka mga bata sa Pilipinas nga mga epileptic o patulon, usa ka seizure disorder.
Apan nakaangkon og kadaugan kadtong nangusog nga mahimong legal ang medical marijuana kay ang Dangerous Drugs Board (DDB) niuyon “in principle” sa usa ka resolusyon nga magtugot sa paggamit sa cannabidiol (CBD) alang sa severe epilepsy.
Ang DDB mao ang magpanday sa mga policy ug strategy sa gibyerno sa pagkontrolar sa abuso sa drugas. Sa gatosan ka mga kemikal gikan sa marijuana, ang CBD, usa ka pain reliever, usa sa duha nga labing aktibo. Ang ikaduha mao ang tetrahydrocannabinol (THC) nga makapa-high ug makaadik.
Usa ka taho sa World Health Organization (WHO) nag-ingon nga segun sa mga pagtuon di makaadik ang CBD ug napamatud-an sa mga scientists mga makaalibyo kini niadtong atakehon sa patol.
Si Undersecretary Benjie Reyes, usa ka permanent member sa DDB, niingon nga girekomendar sa WHO ngadto sa Commission on Narcotic Drugs (CND) sa United Nations nga itugot ang CBD nga dunay 0.2 porsento sa THC nga i-reclassify ubos sa 1971 United Nations Convention on Psychotropic Substances isip Schedule 4, kon gigamit nga tambal ug gamay da ang kahigayonan sa pag-abuso.
Samtang giaprobahan sa United States Drug Enforcement Agency niadtong 2018 ang legal nga paggamit sa CBD nga dunay 0.1 porsento sa THC. Giaprobahan usab sa US Food and Drug Administration (FDA) ang legal nga paggamit sa Epidiolex, usa ka CBD oral solution nga ginama sa GW Pharmaceuticals, alang sa pagtambal sa duha ka matang sa patol, ang Lennox-Gastaut syndrome ug Dravet syndrome, sa mga pasyente nga dos anyos ang edad pataas.
Si Reyes niingon nga maoy ilang baruganan nga di na kinahanglan ang usa ka balaudnon sa paghimong legal sa medical marijuana. Apan kon duna nay balaod nga mapasar mas madali ug di na sila maghuwat pa sa desisyon sa CND.
Apan bisan pa kon way balaod, ang medicine form sa cannabis nga CBD mahimong marehistro sama sa mga opiates, moprhine ug cocaine nga gihimong anesthesia. (edbarrita@gmail.com)