WALA ako maka-ila personal ni retired Municipal Trial Court (MTC) Judge Gerardo Gestopa ug sa iyang asawa nga si Louella. Apan nakadayeg ko sa ilang gihimong sakripisyo sa pagluwas sa ilang pinalanggang apo nga si Jeric. Si Jeric, 21 anyos ug aduna kini gihambin nga kakulian sa iyang pagkatawo sukad sa iyang pagkabata gumikan kay usa siya ka autistic.
Nasunog ang panimalay sa mga Gestopa niadtong Lunes sa kadlawon nga nahimutang sa Zamora St., barangay Centro, Mandaue City, likod nga bahin sa Mandaue City Hall. Nakagawas na unta gikan sa ilang nagdilaab nga panimalay ang magti-ayong Gestopa apan mibalik kini pagsulod ug gisungasong ang kayo aron lang luwason si Jeric nga didto nahimutang sa rooftop sa ilang panimalay.
Bisan pa man sa awhag ug pahimangno sa ilang mga kabanay nga dili na mosulod pagbalik, ila kining gibale-wala aron lang maluwas ang ilang pinalanggang apo. Naapil intawon sila sa pagka-sunog. Nakuha tuod ang ilang mga patay’ng lawas apan dili na kini maila kay napaig na og maayo.
Apan ang dakong pangutana ug tanghaga hangtod karon nga tulo na kaadlaw ang nakalabay human sa maong trahedya, wala pa gihapon makit-i si Jeric.Sa atong pagsuwat ning maong lindog wala pa gihapoy kalambuan sa pagpangita kaniya. Naapil ba kaha siya sa pagkasunog o naka-iskapo og naluwas sa maong trahedya? Kon naapil man siya sa pagkasunog, makit-an unta sa mga bombero ang sunog niyang lawas sa lugar nga nasunugan.
Apan bisan gi-unsa sa pagsiksik sa mga bombero ang nasunugan wala may tima-ilhan nga adunay lawas nga nasunog. Ayaw kog ingna nga nahimong abu gyud ang lawas ni Jeric nga morag gi-cremate nga natunaw gyud. Ang mga mananap man gani dili man gyud masunog og maayo nga mahimong abu. Maila man gani gihapon.
Ug kon naka-eskapo man si Jeric og adunay nakasagop kaniya, ayaw sab kog ingna nga dili siya maka-estorya sa iyang kaugalingon sa tawo nga nakasagop kaniya og maturn-over siya sa iyang mga kabanay. Asa kaha siya? (bobbygnalzaro@gmail.com)
(Nakit-an na ang patayng lawas ni Jerick kagahapon sa hapon. - Editor)