HUMAN makakuha og hugot nga suporta gikan mismo ni Presidente Rodrigo Duterte, way lipod-lipod nga mipadayag si Police Lt. Jovie Espenido sa iyang kasagmuyo sa liderato ni General Archie Gamboa, ang bag-ong gitudlo nga hepe sa Philippine National Police (PNP).
Gisaway ni Espenido ang kasalikwaot sa intelligence report nga nahagdaw niini sa dihang nalambigit ang iyang pangalan sa mga pulis personnel nga anaa sa drugs watch list sa Presidente.
Niadtong Martes, si Espenido nakadalikyat sa Sugbo ug na-interview ni Atty. Ruphil Banoc sa dyHP.
Ning higayona, gipabuhagay ni Espenido ang iyang kasinatian ug kalagot ngadto ni Gamboa kinsa yano ra nga mirelibo kaniya isip deputy chief sa operation sa Bacolod City nga wa gani mopakisusi og maayo.
Sa intonada sa iyang sinulti-an, masabot nga daw og sa nakuhaan siya og pagsalig sa liderato ni Gamboa.
Sukwahi sa uban, wa usay kahadlok si Espenido nga misaway sa kinatas-ang opisyal sa ilang herarkiya nga daw ug bisa’g unsa pay mahitabo andam kining moatubang ug magpakamatay.
“Wala koy laing gituohan. Gidugangan lang anang mga drug lord nga grupo. Mahadlok man nang pulis, pero nagplano sad na sila. Pero ang pinaka authority gyud, wala koy lain. Ang PNP buotan, pero ang tawo sa PNP maoy problema,” ni Espenido sa interview ni Banoc.
Sayod sa Espenido kon unsa ka dakong paril kining iyang giatubang karon, apan wa siyay gipakita nga simbolo sa katalaw.
Kon kaniadto giabibahan si Espenido tungod sa iyang pagpakigkombati sa mga dagkong drug personalities, karon ang pagpakigbatok na usab sa mga dagkong opisyal lakip na ang mga dagkong pulitiko, maoy laing panid sa iyang panerbisyo sa gobiyerno.
Bugti usab niini ang siguridad sa iyang kinabuhi.