GIAWHAG ni Gobernador Gwendolyn Garcia ang tanan nga mga Rural Health Units (RHU) ingon man ang local chief executives sa kalungsoran nga mopahigayon og clean up sa mga sapa og suba niini aron malikayan ang bisan unsa nga sakit.
Kini human nag positibo ang Butuanon river sa dakbayan sa Mandaue sa polio virus.
Matod ni Garcia nga kinahanglan nga sigurohon sa mga pangu sa lungsod nga limpyo ang palibot.
“We are calling on all of our local chief executives to see to it that rivers and tributaries within their local government units be kept clean and free of debris and trash even as we also encourage the clean up of all slopes and riverbanks,” matod ni Garcia sa mga tigbalita gahapon, Pebrero 19, 2020.
Sa datos nga natala sa Provincial Health Office (PHO) padayon ang pag kunhod sa porsyento sa mga bata sa lalawigan sa Sugbo ang naka kompleto sa bakuna batok polio.
Buot sa lalawigan nga makab-ot ang sinto porsyento nga vaccination sa 74, 015 ka mga bata sa 2019.
Apan base sa datos nga natala sa PHO moabot sa 56. 04 porsyento lang ang naka kompleto sa Oral Polio Vaccine weakened polio virus (OPV 1), 56.59 porsyento sa OPV 3 samtang 50. 16 porsyento ang naka kompleto sa Injectable Polio Vaccine inactivated polio virus (IPV) sa lalawigan.
Mas ubos kini kon itandi sa lista sa 2018 sa mga naka kompleto sa vaccination.
May target nga moabot 84, 147 ka mga bata ang ma bakunahan sa 2018.
Niabot sa 66.66 porsyento ang naka human sa OPV 1, 67.72 porsyento sa target ang naka kompleto sa OPV 3 samtang 46. 87 porsyento sa IPV.
Gipasabot ni Dr. Cristina Gianggo pangu sa Provincial Health Office (PHO) nga mag depende ang target sa growth rate sa lalawigan.
Dako usab og gikatampo ang isyu sa dengvaxia hinungdan sa kahadlok sa mga ginikanan pag pa-bakuna sa ilang mga anak.
“Sa ato sa province nga mag inventory lang gyud sa bata nga wala mahatagi og immunization last year para matagaan sila karon tungod sa dengvaxia niubos gyud ang atong immunization,” matod ni Gianggo.
Matod ni Gianggo nga kinahanglan nga mabakunahan ang mga bata nga nag edad singko paubos.
Tungod niini, giawhag ni Gianggo ang mga lokal nga kagamhanan sa lalawigan nga hingusgan ang pagpahibaw sa mga kalungsuran og pag pasabot kanila sa importansya sa pag bakuna.
Giabisohan usab niini ang mga pangu sa RHU’s sa lalawigan nga mopahigayon og inventory sa mga bata nga wala pa ma-bakunahi og i-follow up kini aron ma kompleto ang tulo ka dose sa bakuna. (ANV)