DILI mominos upat ka intersadong bidders alang sa pagtukod sa P228 medium rise building (MRB) para sa mga nasunogan sa Barangay Lorega San Miguel, dakbayan sa Sugbo.
Si Rodjun Taneo, chairman sa Bids and Awards Committee (BAC) para sa imprastraktura, nagkanayon nga ilang gipahigayon kagahapon, Pebrero 19 ang pre-bidding conference nga gitambongan sa unom ka mga representante sa contractor.
Gipadayag ni Taneo nga adunay upat nga nakauyon sa ilang mga Terms of Reference (TOR) sa design and build scheme para sa ipatukod nga low cost housing nga gikatakdang mapuy-an sa labing minos 160 ka pamilya.
Ang duha ka representante sa contractor nipasupot sa ilang mga pangutana kalabot sa katukoran sa gitinguha nga MRB ni Mayor Edgardo Labella nga apil sa iyang ten-point agenda.
Dugang sa chairman sa BAC nga karong Marso 4, ang gustong mosalmot sa bidding proper kinahanglan nga mopakita sa ilang design and build scheme atubangan sa mga sakop sa BAC, design and build committee.
Gipadayag ni Taneo nga karong Marso 5 mao ang ilang pagpanawat sa iduso nga dokumento apil na ang bid amount sa tukoron nga edepisyo diin ilang ilugan ang P228 milyones nga approved budget contract (ABC).
Base sa Republic Act 9184 kun Government Procurement Reform Act, ang labing ubos nga bid amount ug nindot nga desinyo nga haom puy-an sa mga tawo maoy mogawas nga mananaog o makakuha sa proyekto.