NAGTINGUHA si ALA fighter Jeo Santisima nga sun-on ang kalampusan nga naangkon ni 8-division world champion Manny Pacquiao dihang miaway ang Pambansang Kamao sa Pilipinas sa Amerika sa labing unang higayon.
Niadtong Hunyo 23, 2001, si Pacquiao misulong sa Amerika sa labing unang higayon diin igo lang siyang gipuli sa orihinal nga kontra ni kanhi International Boxing Federation (IBF) super bantamweight champion Lehlo Ledwaba.
Grabe ka inilog si Ledwaba ug daw para ‘lawog lang sa terong’ si Pacquiao niadtong higayuna apan lahi ang resulta.
Bangis nga gikulata’g insakto ni Pacquiao si Ledwaba ug mirehistro kini’g 6th round TKO nga kadaugan.
Mao kini ang nag-abli og pultahan ni Pacquiao alang sa daghang mga oportunidad.
Ning higayuna, anaa sa samang sitwasyon si Santisima sa naagian ni Pacquiao kapin sa 18 ka mga tuig na ang nakalabay.
Si Santisima (19-2, 16KOs) mosagubang sa labing lisod ug labing dako niyang away diin suwayan niya’g ilog ang korona ni World Boxing Organization (WBO) super bantamweight champion Mexican Emanuel Navarrete karong Pebrero 23, 2020 (RP time) sa MGM Grand Garden sa Las Vegas.
Sa ilang unang panagtagbo sa MGM Grand Garden sa usa ka press conference kagahapon, gitataw ni Santisima nga ang kadaugan ni Pacquiao batok kang Ledwaba maoy gihimo niyang inspirasyon alang ning maong malisod nga tahas nga naghuwat kaniya.
Mao sab kini ang labing unang away ni Santisima sa Amerika ug sama ni Pacquiao kaniadto, wala siya mailhi sa boxing fans sa Amerika.
“Mao lagi gisulti ni Jeo sa media nga gusto niyang masuon ang pagdaog ni Pacquiao kontra ni Ledwaba. Pareha sila og timbang nga giawayan, super bantam sab,” matod ni ALA stable head trainer Edito Villamor sa pagpakighinabi ning mantalaan sa Facebook messenger kagahapon.
Giangkon ni Villamor nga lisod ug delikado nga kontra si Navarrete apan dako ang iyang pagsalig nga mopatigbabaw si Santisima ning awaya.
“Lisod ni nga kontra si Navarrete pero sa akong tan-aw, dako kaayo ang chance ni Jeo nga maka-upset,” pasabot ni Villamor, kinsa usa sa mga kauban ni Santisima sa Amerika.
Giklaro sab ni Villamor nga wala siya nakabantay nga nabag-uhan si Santisima sa palibot.
“Wala man, normal ra man kaayo si Jeo. Deteminado kaayo siyang modaog aning awaya,” dugang ni Villamor.
Si Santisima niabot sa Amerika niadtong Lunes kauban sila si Villamor, iyang trainer nga si Michael Dominggo ug ALA Promotions president Michael Aldeguer.
Sa laing bahin, gipaneguro ni Villamor nga wala’y problema sa timbang si Santisima.
“Karon, two pounds na lang ang iyang over. Inig weigh-in, wala ra tay problema sa timbang,” pasabot ni Villamor. (ESL)