NAKATILAW na sab og laing dako nga kapildihan ang San Miguel Beermen sa Phoenix Super Basketball Tourney batok sa Phoenix Pulse Fuel Masters, 90-108, kagahapon sa The Upper Deck.
Ang Beermen, nga ningkombati nga wala ang duha sa ilang mga haligi nga sila si JuneMar Fajardo ug Marcio Lassiter, nakatilaw sa ikaduha nilang kapildihan sa samang gidaghanon nga mga duwa ning maong kompetisyon. Sila si Fajardo ug Lassiter pulos adunay angol.
Gipangulohan ni Matthew Wright ang Fuel Masters pinaagi sa iyang 19 puntos, nidugang og 17 puntos si Jason Perkins samtang niamot og 15 puntos ug 10 rebounds si Justine Chua.
Ang Beermen gipangulohan ni Arwind Santos pinaagi sa iyang 17 puntos samtang niamot og 13 puntos si Chris Ross.
Ang unang naglampaso sa Beermen mao ang NLEX Road Warriors.
Puntos matag usa:
Phoenix Pulse (108) – Wright 19, Perkins 17, Chua 15, Reyes 13, Napoles 11, Jazul 9, Intal 8, Heruela 6, Tansingco 5, Rios 5. San Miguel (90) – Santos 17, Ross 14, Zamar 10, Escoto 9, Romeo 8, Gamalinda 6, Ganuelas-Rosser 6, Pessumal 5, Mamaril 4, Cabagnot 3, Comboy 3. (ESL)