Casimero mangulo sa mga pasidunggan

PANGULOHAN ni World Boxing Organization (WBO) bantamweight champion Johnriel ‘Quadro Alas’ Casimero ang walo ka mga boksidor nga pasidunggan sa 37th Sportswriters Association of Cebu (SAC)-San Miguel Beer (SMB) Cebu Sports Awards karong Pebrero 29, 2020 sa SM City Cebu Northwing.

Si Casimero, kinsa lumad nga taga dakbayan sa Ormoc apan naghashas sa iyang abilidad sa boksing dinhi sa dakbayan sa Sugbo, usa sa mga hatagan og major award gumikan sa maayo niyang kampanya sa miaging tuig.

Ang 31 anyos nga boksidor nahimong three-division world champion niadtong 2019 human niya naangkon ang kasamtangan niyang bakus.

Nadaog niya ang interim nga bersyon niini pinaagi sa 12th round knockout nga kadaugan batok kang Ricardo Espinoza niadtong Abril 20, 2019 sa Carson, California.

Nadepensaan niya ang iyang interim title pinaagi sa 10th round knockout nga kadaugan batok kang Cesar Ramirez niadtong Abril 24, 2019 sa Manila.

Sa labing ulahi niyang away niadtong Nobiyembre 30, 2019, mirehistro si Casimero og makapaukyab nga 3rd round TKO nga kadaugan batok sa mas inilog nga si Zolani Tete sa Birmingham, England nga nagpahimo kaniyang undisputed WBO bantamweight champion.

Si Casimero kasamtangang nangandam alang sa labing dako ug labing lisod niyang pagsuway nga usa ka unification bout batok kang World Boxing Association (WBA) Super ug International Boxing Federation (IBF) bantamweight titleholder Naoya Inoue karong Abril 25, 2020 sa Mandalay Bay Resort and Casino sa Las Vegas.

Hatagan og citation matag usa mao ang laing professional boxers nga sila si Rey Caitom Jr., Joe Noynay, Carlo Demecillo, Mark Vicelles ug Dave Peñalosa hasta ang amateur boxers nga sila si Pathricia Mae Sumalinog ug Bienjemar Codoy gumikan sa maayo nilang performance sa miaging tuig.

Si Caitom, kinsa lumad nga taga Mandaue City, milampos sa iyang duha ka mga away niadtong 2019. Siya ang kasamtangang World Boxing Council (WBC) ABC Continental minimumweight champion.

Si Noynay misakmit sa bakanteng WBO Asia Pacific super featherweight belt nga iyang nadepensaan ka usa.

Si Demecillo, kinsa sakop sa Big Yellow Boxing Gym sa Cebu, midaog sa tanan niyang tulo ka mga away. Siya ang kasamtangang WBO Asia Pacific Youth bantamweight king.

Sa iyang bahin, si Vicelles midaog sa duha niya ka mga away nga nagpahimo kaniyang WBA Asia South light flyweight champion.

Samtang si Peñalosa, kinsa anak ni kanhi two-division world champion Dodie Boy Peñalosa, midaog sa tulo niya ka mga away ug siya ang kasamtangang WBO Oriental featherweight champion.

Sila si Sumalinog ug Codoy hatagan og citation gumikan sa ilang paglangkat og gold medals sa Palarong Pambansa. (Pooled Report)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph