GITUMBOK nga sakop ni anhing self-confessed drug lord Franz Sabalones isip hitman nadakpan sa kapulisan sa Dakbayan sa Sugbo niadtong Miyerkules sa buntag, Pebrero 19, 2020.
Ang akusado sa kasong murder ug giisip nga no. 1 most wanted person sa Dakbayan sa Sugbo, giingong posibleng usa sa mga ning-ambush kanila ni San Fernando Mayor Lakambini “Neneth” Reluya, diin namatay ang iyang bana nga si Association of Barangay Councils president Ricardo "Nonoy" Reluya ug laing duha ka mga kauban kapin sa usa ka tuig na ang nilabay.
Ang nadakpan pinasikad sa warrant of arrest nga giisyu ni Judge Galicano Arriesgado sa Regional Trial Court (RTC) Branch 18 sa Dakbayan sa Sugbo sa kasong murder mao si Wilfredo Labitad Sabella.
Si Sabella nasikop sa City Intelligence Branch (CIB) sa usa ka balay sa Campo 3, Barangay Jaclupan, Dakbayan sa Talisay.
Siya lumad nga taga Barangay Buhisan, Siyudad sa Sugbo, apan human makapatay sa iyang silingan niadtong 2001, nisibat na kini ug nagtago sa Campo 3 ug mga silingang dapit sa Jaclupan.
Matod ni Police Colonel Engelbert Soriano, officer-in-charge sa kapulisan sa Dakbayan sa Sugbo, makadaghan na nila gisuwayan sa pagdakop si Sabella, apan sila naglisud tungod kay idlas.
“Marami pong attempts na arestuhin ang taong ito. Pero dahil sa very strategic yung kanyang pinagtatagoan at napaka hard to reach nung lugar, na-maintain nya yung kanyang safety doon. But, last February 19, ginawan talaga natin ng paraan na makuha siya at finally naaresto nga namin,” matod ni Soriano.
Sa nakuha nga kasayuran ni Soriano, sakop sa Jerome Labitad group nga nalambigit sa gun-for-hire sa siyudad sa Talisay ug tibuok Sugbo si Sabella.
Nidaku pa ang grupo dihang sila namaligya na sa illegal nga drugas ubos kang Sabalones.
Dugang niya nga lakip sa ilang nakuha nga impormasyon nga ilang ipaubos sa validation nga apil si Sabella sa pag ambush sa sakyanan ni Reluya sa Barangay Linao, Siyudad sa Talisay.
“Tinitingnan namin yan, yung coordination namin sa CPPO. Baka ma settle namin yan,” matod ni Soriano.
Si Sabella nanghimakak nga sakop siya ni Sabalones kay wa siya makaila.
Usa ra sab siya ka buwan ubos ni Labitad kay wa siya makauyon sa batasan niini. (AYB)