ORMOC CITY, Leyte -- Gidayeg sa kadagkoan sa Department of Environment and Natural Resources (DENR) ug National Solid Waste Management Commission (NSWMC) ang 10-year Solid Waste Management Plan sa Ormoc City.
Mismo si Mayor Richard Gomez ang nipresentar sa maong plano uban sa taga City Environment and Natural Resources.
Gipakita ni Gomez ang mga target ug budget allocation sa maong plano sama sa pagsira sa kasamtangan nga sanitary landfill ug pag-abli og bag-o.
"Yung ibang lugar kasi porke may tatapunan sila, okay lang kung tapon ng tapon. You can see the consciousness if this city na kahit may pagtatapunan ka, gusto pa rin nila i-prolong ang buhay ng facility," matod ni Crispian Lao sa NSWMC.
Matod sa mayor nga ipasira nila ang kasamtangan 1.8 hektarya nga landfill ug ablihan karong tuiga ang bag-o nga 3 hektarya nga landfill.
Gitan-aw ni Gomez nga daghang basura ang makolekta sa umaabot gumikan sa pagsaka sa populasyon sa syudad ug daghang mga establismento.
Gitan-aw nga sa tuig 2029 ang Daily Waste Generation moabot na sa 197,708.10 kilogramos diin 41.08 porsiyento gikan sa biodegradable waste; 28 porsiyento gikan sa recyclable waste; 29 porsiyento gikan sa residual waste ug 2 porsiyento gikan sa special waste.
Gani strikto karon nga giimplementar sa syudad ang Ecological Waste Management Ordinance aron maibanan ang gidaghanon sa basura nga makolekta sama sa dili paggamit og plastic sa Miyerkules ug Sabado.
Apil niini ang pag isyu og citation ticket niadtong mga tawo nga magpataka og labay sa basura, magpagawas sa basura bisan dili adlaw sa koleksyon ug ang pagdaob.
Lakip sa 10-year plan ang raod repairs ug resurfacing, hazardous waste facility, health waste facility, pagpalit og dugang container vans ug dumptrucks, repair and maintenance, manpower ug daily operations.
"Maayos yung plano nila. I think it's one of the comprehensive plans that we have seen. The plans kasi has to have targets and budgets, so it's all there," dugang ni Lao.
Matod ni Lao nga dakong hagit sa mga lokal nga kagamhanan ang implementasyon sa maong plano.
Dugang niya nga karon pa lang, nakita na nila sa Ormoc ang implementasyon kay sa ilang paglibot nakita nila ang kalimpyo hilabi na sa mga sapa.
Isunod nila pud nila ang monitoring sa mga lokal nga kagamhanan kon na implementar ba ang maong plano. (JKDP)