DAVAO DE ORO -- Usa ka babayeng negusyante gidakop human gipaandar ang gipanag-iyahang bolmilan bisan sa gipatuman nga cease and desist order sa Department of Environment and Natural Resources (DENR) didto sa Purok 18, Barangay Mt. Diwata, Monkayo.
Matud pa nga alas 12:10 sa udto, Miyerkules, Pebrero 19, ang negusyante nga ginganlan og Rubilyn Taguran Mirafuentes, 45, molupyo sa nahisgutang dapit giindorso ngadto sa Monkayo Municipal Police Station pinaagi nila Naresh Galacio sa Mines and Geosciences Bureau Davao Region ug Wilson Concordo sa DENR-Davao Region.
Matud pa nga ang suspek nasakpan nga nag-operate sa iyang bolmilan bisan sa gipakanaug nga cease and desist order.
Gawas sa negusyante, gidakop usab ang 63-anyos nga minero nga si Harry Fernandez Monticalbo, molupyo sa samang dapit human nasakpan nga nag-operate sab sa Carbon Pulp Plant (CIP Plant).
Lakip nga nasakmit gikan sa maong minero ang compressor ug motor mill.
Sama kang Monticalbo, giindorso usab ngadto sa Monkayo MPS ang negusyante nga si Johnny Matas Jakosalem, 45, human naaresto gumikan sa pag-operate sa CIP Plant.
Gipang-aresto ang mga suspek gumikan sa paglapas sa Environmental Law kun Republic Act 7942 o Philippine Mining Act of 1995.
Wa na gitugot sa maong dapit partikular sa Brgy. Mt. Diwata ang pag-operate sa mga bolmilan human nagpakanaug na og mando ang MGB XI pinaagi sa gipaguwang cease and desist order niadtong Pebrero 10, 2020 ug gimandoan ang mga nanag-iya og mga bolmilan ug planta ibalhin ngadto sa Sitio Mibatas, Brgy. Upper Ulip aron nga masugdan ang himuong rehabilitation sa Naboc River nga giingong nadaut na gumikan sa hugaw gikan sa mga planta ug bolmilan. (Dexter T. Visitacion)