Kapitanes gipaandam og lubnganan sa mga baboy

(SunStar Pampanga file photo)
(SunStar Pampanga file photo)

MATANAO, Davao del Sur -- Ang Municipal Agriculture Office (MAO) nagbutyag nga gi-obliga nila ang mga barangay kapitan sa 33 ka barangay sa lugar aron moandam og lugar nga kalubngan sa mga baboy ugaling makasud ang African Swine Fever (ASF) sa ilang dapit.

Si Evelyn Ceniza, municipal agriculture officer, nagbutyag sa SunStar Superbalita, nga gikinahanglan ang pagpangandam una makasud ang kagaw sa lugar bisan pa man sa gipatuman nga hugot nga seguridad.

Giangkon ni Ceneza nga lisod ang pagsumpo kung makasud ang ASF sa usa ka lugar kay makahugno kini sa ekonomiya.

“Once makasulod ang ASF kinahanglan naa na dayoy kalubngan para makahimo dayon sa quick depopulation,” pung pa niya.

Sumala niini nga kinahanglan adunay burial site ang matag barangay ug adunay gilawmon nga 6 feet.

Matud sa MAO kinahanglan nga mangandam ang lokal nga gobyerno sa ilang backhoe, samtang ang mga opisyal sa barangay mag-andam sab og trapal, upat ka mga tawo nga maoy mobunal sa mga baboy gamit ang maso.

Gikinahanglan nga andam na ang mga gagmay’ng garapa aron sudlan sa tissue samples ug butangan og label.

Si Ceniza nitataw nga ugaling adunay usa ka baboy nga mamatay sa usa ka barangay angayan nga ma-implementar gilayon ang 1-7-10 protocol bisan wa pa makompirma nga ASF ang hinungdan niini.

“Thirty pigs within the 7-kilometer radius will be tested and quarantine measures must be done,” asoy niini.

Gitahasan sab ang mga opisyal sa barangay nga mohimo og weekly reporting ug inventory sa ilang swine population.

Gipasabot ni Ceneza nga gikinahanglan ang pagpangandam sanglit way nasayod kon adunay nakalusot nga baboy gikan sa Brgy. Laperas ug Palili sa silingang lungsod sa Sulop una pa man nasayran nga kontaminado ang mga baboy sa lugar.

Nanaghap ang mga opisyal sa agrikultura nga molungtad pa ang suliran sa ASF mao nga angayan ang pagtinabangay ug koordinasyon sa mga nagbuhi og baboy.

Gihangyo sab sa MAO ang buhatan sa mayor nga mohimo og Municipal Task Force against African swine fever aron mapatuman ang hugot nga pagbantay sa ASF.

Gitahasab sab ang mga Technical personnel ug livestock technicians nga mokolekta og mga tissue samples isip kabahin sa preventive measures. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph