KON basehan ang mga nangaging panagsangka tali sa Filipino boxers ug Japanese fighters, kasagaran modaog gyud ang mga hapon sa mga world title fight sukad sa tungatungang bahin sa niaging tuig.
Tungod niining obserbasyon, napanglantawan nga ato modap-ig ang kadaugan nila ni Naoya Inoue ug Junto Nakatani kinsa makigsangka karong Abril batok nila ni Johnriel Casimero ug Giemel Magramo.
Si Inoue (19-0), ang WBA, IBFR ug Ring Magazine champion makigsinukliay sa iyang kumo ni WBO world bantamweight champion Casimero (24-4) sa ilang unification fight sa Abril 25, 2020 sa Las Vegas, Nevada sa main event sa Top Rank Promotion.
Apan sa dili pa kining away, magtigi usab si Nakatani ug Magramo sa Abril 4 didto sa Korakuen Hall sa Tokyo, Japan alang sa bakanting WBO flyweight title.
Hinuon ang kasaysayan nagtug-an nga sa 2019 hangtod na sa 2019, ang mga Filipino fighters mao gyud ang perming mopatigbabaw batok sa hapon.
Kini sama sa mga kadaugan nila ni Donnie Nietes, Vic Saludar ug Jerwin Ancajas.
Apan kini naputol na sa niaging tuig. Nagsugod kini sa kadaugan ni Kazuto Ioka kinsa midaog pinaagi sa technical knockout batok ni Aston Palicte sa ilang WBO super flyweight title niadtong Septiyembre 2019.
Sa wa pa kini mahitabo, si Ioka maoy gipildi ni Neites sa mao niadtong Nobiyembre 2018 alang sa mao gihapon nga titulo. Apan gipalabi ni Nietes nga iya kining buhian kay sa iyang depensaan batok ni Palicte.
Sa niaging Nobiyembre, gipildi ni Inoue ang multi division world titist nga si Nonito Donaire sa ilang world title fight.
Kini maoy nakapalig-on sa pangagpas nga ang trending karon sa boxing tali sa duha ka nasod atoa pabor sa Japan.
Apan kini maoy bunga sa mga obserbasyon lang. (JBM)