NASUGAMAK na usab og laing kapildihan ang Alab Pilipinas ug ning higayona sa ilang pagsulong sa Kuala Lumpur Dragons, 80-92, didto sa Maba Stadium sa Malaysia sa Asean Basketball League niadtong Miyerkules, Pebrero 19, 2020.
Kini human nga wa makaduwa ang ilang import nga si Justine Brownlee tungod kay wala kini makasakay sa iyang flight paingon sa Kuala Lumpur.
Niini gipahimuslan sa host team ang pagpalta sa 31 anyos nga Brownlee ug tuod man, ilang yanong natukmod ang Alab ngadto sa ikaunom nga kapildihan niini sa 15 ka mga duwa.
Saktong dominasyon ang gipakita sa Dragons nga gani sa second half nakaposte na kini og 28 puntos nga labaw.
Si Nick King misuway unta pagduslit sa rally sa Alab human kini nakapuga og 17 p0untos sa katapusan nilang hunat apan wa kini mapaigo sanglit dako na kaayo ang naposte nga labaw sa Dragons. Siya mitapos sa duwa nga may 28 puntos.
Wala usab makapakita og saktong labok ang import nga si Sam Deguara ug nalimitahan lang kini ngadto sa kuwatro puntos. Hinuon pabiling naghupot ang Alab sa ikaduhang luna sa standing, 9-6, sunod sa Mono Vampire nga may 12-4 nga baraha.
Si Charlie Dy, ang team owner, nga mibutyag nga ang unang duwa ni Brownlee sa Alab mahinayon na karong Dominggo, Pebrero 23 sa dihang mo-host ang Alab sa Macau Black Bears sa Sta Rosa Sports Complex in Laguna. (JBM)