KINSA may imong botohan nga kandidato pagka presidente?” matod sa pasaherong lalake nga morag bading ang tuno sa sinultihan. Naglingkod siya dapit sa wala sa dyip.
Gipangutana niya ang lalake nga naglingkod sa atbang dapit sa tuo.
Ang dyip nagpadulong sa Talamban Ang duha nagkadungan og sakay sa terminal sa Ayala ning sayong kahapunon. Kasamtangang nagtungas ang dyip sa flyover padulong sa Barracks.
“Wa man koy nauyonan ana nilang tanan,” tubag sa lalakeng naglingkod sa atbang, nga bading sab ang tunada sa sinultihan.
“Ngano man?”
“Wa man gyuy mipabor sa ‘same sex marriage’!”
“Pabor diay ka ana?”
“Pabor kaayo! Naa na god koy gustong pakaslan.”
Puno sa pasahero ang dyip. Ang ubang pasahero nagpahiyom nga naminaw sa duha nga nagkulokabildo, hasta ang konduktor nga nagkapyot sa estribo dapit sa pultahan. Ang drayber sab molili panagsa sa rearview mirror. “Maayo ka, may pamanhunon!”
“Ikaw diay? Kon may balaod dinhi sa ato para ‘same sex marriage’, di diay ka magpakasal?”
Nagtinan-away ang ubang mga pasahero.
“Kon duna!”
“Di na pwede ang ‘same sex marriage’, uy! Pabaliw na. Lipakan mo ana!” sagbat sa konduktor nga dugay nang naminaw sa duruha.
“Moderno na ta karon. Motuo pa diay kag baliw o lipak?” sa bading nga naglingkod sa tuo.
“Tataw na sa Bibliya. Gidili sa Diyos ang ‘same sex marriage’,” sa konduktor.
“Kaniadto kaha. Dili na estrikto karon ang Diyos,” sa bading nga naglingkod sa wala.
“Unsay imong kamatuoran?” sa konduktor.
“Kon Bibliya ang basehan, kanang pag-ampo sa imahe kaniadto, gidili na sa Diyos. Ang magbuhat ana kilatan ug masunog. O dili ba, moliki ang yuta ug lamyon sila sa yuta. Karon, di na dihadiha mokastigo ang Diyos. Gipasagdahan na Niya ang mga tawo,” sa bading nga naglingkod sa tuo.
“Unsay imong kamatuoran?” sa konduktor.
“Kanang nag-ampo sa imahe ni Birhen Maria, Santo Nino o Black Nazarene o sa tanang rebulto. Tataw na nga ‘idolatry’ sumala sa Bibliya, apan gipasagdahan na sa Ginuo kay dili na Siya estrikto sama kaniadto,”sa bading nga naglingkod sa tuo.
“Sa ato pa, kon kamoy pasultihon, gitugot na karon sa Diyos ang ‘same sex marriage’?” sa konduktor.
“Oo, gitugot na!” misagbat ang drayber. Nakalugar siya kay miurong pa ang dyip sa pula nga traffic signal. “Kon akoy pabut-on, angay tugtan na sila kon ikalipay nila, kay sa batakang balaod may kagawasan ang tawo pagpangita sa iyang kalipay kun ‘pursuit of happiness’!” Milingi kadiyot ang drayber sa duha ka bading.
“Thank you, Mr. Drayber!” nagkadungan pagsulti ang duha ka bading.
“Beeeh!” Gihiwian sa bading nga naglingkod sa wala ang konduktor.
“Pikaaat!” Gipikatan sab sa bading nga naglingkod sa tuo ang konduktor.
Nangatawa ang ubang mga pasahero. Ug nagkinataw-anay silang tanan.
“Wa man ka magsulti nga bading sab diay ka, Bart!” matod sa konduktor ngadto sa drayber. Ug misamot paghugyaw ang mga pasahero. Nahalingi kanila ang mga traffic enforcer nga nagtindog sa karsada. (Katapusan)