DI LANG diay ang Centerstage ang bag-ong programa sa GMA 7 diin si Alden Richards ang host ug apil si Pops Fernandez ug Mel Villena isip mga hurado.
Ugma sugdan ang bag-ong programa ni Vicky Morales nga Ilaban Natin ‘Yan. Atangi!
•••
Nindot ang gipakitang pagsuporta sa GMA 7 sa kaatbang niini nga ABS-CBN kabahin sa isyu nga pag-renew sa prangkisa sa Kapamilya network. Unang nipahayag ang mga news anchor pero ning bag-o lang, nagkadaghan ang taga Kapuso Network nga nipakita sa ilang suporta.
Nalingaw ko (as in nakatawa) nga nagbasa sa mga tubag sa survey ning mantalaan pila ka isyu ang nilabay nga niuyon nga sirad-an ang ABS-CBN. Isip sakop sa media, supak ko nga sirad-an ang usa ka media outlet.
•••
Bisan 3rd runner-up (o fourth placer) ra si Marcelito Pomoy sa America’s Got Talent: The Champions, giingong daghang tanyag ang nangabot aron magpasundayag sa lainlaing lugar sa kalibutan.
Di kasagaran ang iyang abilidad nga dunay duha ka klase sa tingog sa pagkanta. Atong tan-awon kon mobongga ba usab ang career sa grand winner.
•••
Ang representante sa Cebu City South sa unang Bb. Cebu nga si Warlyn Gallaza dunay bag-ong kanta nga nag-ulohan Oras Na.
Naa na sa mga digital platforms ang Oras Na ug makita kini di madugay sa YouTube channel sa Viva Records.
•••
Sama adtong pagkanta ni Girlie Lapinid sa Matud Nila sa Tawag ng Tanghalan, gibati kog garbo nga nagtan-aw ni JP Rivera nga nikanta sa Usahay sa The Voice Teens.
Niangkon si Lea Salonga ug Sarah Geronimo nga bisan wa sila makasabot sa kanta, ilang na-feel nga kinasingkasing ang pagkanta ni JP nga taga Cagayan de Oro.
•••
Nalingaw ko nga nagtan-aw ni Sheryn Regis ug Eric Santos nga nikanta sa ilang winning songs (Come On In Out of The Rain ug This Is The Moment) sa ilang panagtigi 17 ka tuig ang nilabay sa Star In A Million.
Bisan napildi si Sheryn, buhi pa gihapon ang iyang career. Gani niuli siya gikan sa US alang sa iyang show sa Music Museum sa sunod semana kauban si Eric. Bongga!