SA MGA naghuna-huna o nagplano sa ilang bakasyon uban ang tibuok pamilya o barkada ilabi na nga nagkaduol na ang summer vacation, I-apil sa listahan sa inyong suroyon ang Bluepool Waterpark.
Sa wa masayod, ang maong waterpark resort nahimutang sa Guanzon Beach Resort sa Barangay Langtad, lungsod sa Naga, Sugbo.
Bag-o lang gibuksan
Niadto lang Marso 2019 gi-inagurahan ang maong resort diin si House Speaker Gloria Macapagal-Arroyo maoy pinasidunggang dinapit ug ubang tag-as nga opisyal sa Sugbo sama nila ni City of Naga Mayor Valdemar Chiong, Talisay City Mayor Gerald Anthony “Samsam” Gullas, Congressman Eduardo Gullas, Congressman Raul del Mar ug uban pa.
Gawas sa nindot nga nature view adunay mga makalingaw nga pools, water slides, rooms, cottages nga makapatapok sa tibuok grupo ma-pamilya, barkada o kauban sa trabaho.
Schedules
Ang Bluepool bukas gikan sa 9:00 sa buntag ngadto na sa 5:00 sa hapon gikan sa adlawng Lunes ngadto na sa Biyernes.
Sa mga adlawng Sabado ug Dominggo, 24 oras sila nga abli aron sa pag-serbisyo sa ilang mga guest nga mopahimulos sa weekend.
Rates
Si Renneth Tampus, admin manager sa maong waterpark nagkanayon dili magmahay ang ilang guest gawas nga sila malingaw dili sakit sa bulsa.
Mokabat lang ngadto sa P80 ang entrance fee samtang libre kadtong mga bata gikan sa duha ka tiil nga gitas-on paubos. Sa maong kantidad makapahimulos namo sa paglangoy-langoy sa swimming pool.
Sa kadtong mo-avail og cottages adunay tag-P750 alang sa Blue Table nga makasud og 10 ka tawo. Adunay Blu Cottage sa tag-P1,000 adunay maximum og 15 person, laing Pool View nga mahimong kasudlan og 20 ka tawo sa tag-P1,500 ug ang Sky View nga tag-P3,000 bisag 40 ka tawo ang ma-arang niini.
Sa mga mo-prefer og private room ang tapad nga Guanzon beach nagtanyag sa maong accommodation. Aduna sab kiniy camp room – non aircon sa tag - P950 samtang P1,200 ang aircon room, suite room - P1,800 ug P2,500 ang beach house sa kadtong gustong mag-overnight stay.
Nagkanayon si Tampus nga ang ilang mga room gidesinyo alang groups o pang-barkada ug wala silay limit sa gidaghanon sa guest higayon nga masulod lang sa maong lugar.
Dugang pa niya nga ang Guanzon beach ug Bluepool dili sama sa ubang resort nga mopatong og corkage kay libre ra nga makadala og mga pagkaon ang ilang guest, ilabi na niadtong mopahigayon og party.
Kasagaran guest nga mohugpa sa ilang resort mao kadtong mga kompaniya nga mopahigayon og team building lakip na ang mga business process outsourcing ingon man pamilya nga nagsaulog og okasyon.
Pahinumdum
Gawas sa proper swimming attire ang isul-ob, way tugotan nga makagamit sa pool sa higayon nga dili pa kini officially open ug gikinahanglan nga aduna nay lifeguard sa maong area.
Mamahimo sab nga balibaran sa management ang guest nga makagamit sa pool kon aduna kiniy samad-samad, sakit sa panit ug infections ingon man kadtong adunay nasal o ear discharges.
Kini gihimo aron pabilin nga luwas ug limpyo ang swimming pool alang sa kadaghanan.
Waterpark nga barato ang inyong gipangita? Suroyon ta ang Bluepool sa Naga. (Hulagway gikan sa Bluepool Waterpark)