GIHUGTAN na pagpatuman ang ordinansa sa Cebu City kalabut sa anti-jaywalking kun batok sa pagpataka og labang sa dalan nga dili mosubay sa pedestrian lane. Suma sa Cebu City Transportation Office (CCTO) nga nakadakop na sila og 16,000 ka mga tawo sud lamang sa usa ka buwan ug tunga sugod niadtong Enero 1. Kadaghanan sa nadakpan mao ang mga molabang sa mga dalan Colon, Fuente Osmeña ug sa SM City, Mabolo. Natural, kay mao raman kining maong mga dapit ang higpit nga gibantayan sa atong mga traffic enforcer. Mas modaghan pa gayud unta kini kon aduna pay igong mga tawo nga ikadestino sa nagkalainlaing kadalanan sa siyudad sa Sugbo. Kinahanglang i-amendar usab ang maong ordinansa aron umentohan ang i-silot sa mga malapason. Sa pagka-karon gud ang ordinansa nagbuot lamang sa duha ka mga silot- pagbayad og P50, kon dili ba palimpiyuhon sa palibut sa CCTO.
Samtang gihimo kini kinahanglang pintalan pag-usab ang mga pedestrian lane nga nangapapas na ang pintal. Angayang klaruhon usab sa CCTO kon asa gayud ang pedestrian lane atubangan sa SM City. Wa man makasabut ang katawhan nganong gibalhin ang pedestrian lane nga diha unta atubangan gayud sa traffic light nga maoy kasagaran nga butangan niini. Gibalhin kini ngadto sa unahan atubangan sa APM nga way traffic enforcer nga mopahunong sa mga sakyananan kon dunay manglabang. Kuyaw kini sa disgrasya kay di man gud motagad ang badlungong mga drayber bisan anaay daghang tawo nga manglabang. Hinaut pang estriktuhon na sa pagpatuman kining ordinansa sa anti-jaywalking sa tanang mga siyudad sa Metro Cebu ug kinahanglang sustinihan gayud dili kay mag-operasyon lang og pila ka adlaw pagkahuman kalimtan lang usab dayon.
•••
Unsa man gayuy tinuod nga estorya niining Police Lt. Col. Jovie Espenido? Sa dihang siya pa ang hepe sa Albuera, Leyte gidudahan na siya nga nalambigit sa iligal nga drugas. Apan suma ni Espenido nga ang gibasihan niadto mao ang hulagway nga nagkita sila ni anhing Albuera Mayor Rolando Espinosa. Apan sumala niya nga nahitabo kadto tungod kay gisugo siya ni kanhi PNP chief Bato Dela Rosa nga kuhaon niya ang mayor kon motahan kini ngadto sa mga tinugyanan sa balaud. Ang maong pasangil, sumala niya, gi-imbistigar sa adjudication board sa Camp Crame ug nalimpiyuhan niya ang iyang ngalan. Karon, natingala siya nganong usa siya sa 357 ka mga sakop sa PNP nga anaa sa drug watchlist ni Presidente Rodrigo Duterte.
Nagduda si Police Lt.Col. Espenido nga adunay nasuya o kaha naglagut kaniya sud sa ilang organisasyon tungod kay kusog man ang iyang promotion. Lain gidudahan mao ang mga druglord nga nawad-an sa negosyo tungod sa iyang hugot nga kampanya batok kanila.
Wa pa man gayud hinuon mohukom si Presidente Duterte kon tinuod ba ang pasangil batok kang Espenido, apan daku kining sagpa dili lamang kang Espenido, kon dili apil ang tibuok PNP organization. (mannyrabacal1144@gmail.com)