USA SA mga gikaintapang opisyales sa kapulisan sa gubat kontra druga mao si Lieutenant Colonel Jovie Espenido. Apan sa kalit lang, nahilakip siya sa 357 ka mga opisyal sa kapulisan nga mga high value targets (HVT) sa gubat kontra druga.
Linibo na ka mga nahilambigit sa illegal nga drugas ang napatay sa kapulisan sukad sa pagsugod niini. Si Espenido mismo usa sa mga nangulo sa mga operasyon sa kapulisan kontra druga nga nisangpot sa pagkamatay sa mga durugista.
Unsa man kahay gibati ni Espenido karon? Sa usa ka interview sa radio dyHP niadtong buntag sa Martes, Pebrero 18, 2020, siya niingon, “Walay lain nga mopatay nako. Ang gobyerno lang, pulis lang. Ang PNP buotan, pero ang tawo sa PNP maoy problema.”
•••
Matod pa ni Espenido, usa ka “failure of intelligence” ang pagkalakip niya sa maong listahan. “It’s not only a failure, it’s a frustration of the intelligence community. It was a failure of intelligence-gathering because hindi nila nai-process,” matod niya.
Nagtuo si Espenido nga ang iyang ngan giapil sa kontrobersiyal nga drug list sa mga tawo nga dunay koneksiyon ug nahunghong ngadto sa iyang mga labaw nga nahilambigit siya sa illegal nga drugas.
Buot ba niyang ipasabot nga di kasaligan ang maong drug list? Pila na ka mga tawo nga naapil sa maong drug list ang napatay sa kapulisan? Unsa may mahitabo karon nga siya nga nigukod niadtong nalakip sa maong lista naa na sab sa maong lista?
•••
Usa sa iyang gibasol sa kapakyas sa pag-verify sa impormasyon mao si General Archie Gamboa, hepe sa PNP. Apan di kaha mosamot nga mamiligro si Espenido kay gimandoan man diay sila ni Gamboa sa di pagpadayag sa ilang opinyon sa publiko?
Sigi na diay si Espenido og pa-interview sa media bisan sa wa pa siya marelibohi gikan sa iyang puwesto didto sa Bacolod City. Gawas sa interview sa radyo dinhi sa syudad sa Sugbo, nagpadala usab siya og mga text messages sa media sa kaulohan.
Mahimong nahimo niya kini sa wa pa ang gag order ni Gamboa samtang gihimo pa ang adjudication sa opisyales nga nalakip sa drug list. Apan si Espenido niingon nga na-clear na siya sa mga alegasyon sa kalambigitan sa drugas niadtong tuig 2017 pa.