GIIMBESTIGAR karon sa Cebu City Health Department ug City Hall Legal Office ang isyu kabahin sa sanitation o kalimpyo sa mga baligyang pagkaon sa Larsian. Kini human mimando si Mayor Edgardo Labella sa pag-imbestigar human usab mikatap sa social media labi pa sa Facebook ang ilaga o mga ilaga nga nagdagan-dagan sa gibaligyang barbecue sa usa sa mga stall.
Ang yuta diin mahimutang ang Larsian sa may Fuente Osmeña gipanag-iya sa Kagamhanan sa Lalawigan sa Sugbo, apan gipaabangan og concessionaires. Naila ang lugar nga anaa ang lami nga street foods. Usa kana sa mga paboritong kan-anan sa mga lokal ug langiyaw nga mga bisita. Naapil god sa awit ni Dandin Ranillo nga ‘Cebu’ nga nag-feature sa mga tourists destinations dinhi sa lalawigan ug dakbayan sa Sugbo.
Apan karong bag-o nakontrobersiyal ang lugar human mokatap sa social media ang hulagway nga adunay nakita nga ilaga nga nagdagan-dagan sa mga barbecue nga gi-display sa usa sa mga stall. Aw, kon ilaga, makaingon ta nga hugaw gyud kay naa god na maglublub nang ilaga sa mga kanal ug hugaw nga lugar.
Maayo og rabbit kay puwede pang apilon og barbecue kay gi-encourage naman sa taga Department of Agriculture nga ihawon ang rabbit kay puno sa nutrients ug bitamina. Dunggan ra man ang deperensiya anang rabbit ug ilaga ba. Dako lang ang dunggan sa rabbit. Pero “white meat” kuno ang rabbit ug dili maka high blood dili sama sa baboy. Lami gihapon ang baboy uy labi pag-humba sama sa humba sa Cabadiangan sa ilang Atty. Eddie Barrita.
Pero unsa ka tinuod kining version sa tag-iya sa maong stall nga gi-sabotahe kuno siya ni Provincial Treasurer Roy Salubre nga maoy nagdumala sa Larsian. Kay matod pa ang tag-iya sa stall daghan og kostomer ug nasuyaan lang siya. Kay matod pa nga si Salubre nag-negosyo pod diha. Kon tinuod man gani ni, dili kaha “conflict of interest” ni? Ug moingon nga sabotahe, unsa man tong ilaga gipadagan-dagan ni Salubre sa stall ug dayon gilitratuhan aron dauton ang tag-iya? Simpol lang ang solusyon sa pagwagtang anang mga ilaga. Butangan pod og mga iring. (bobbygnalzaro@gmail.com)