DUGANG modernong public transportation ang modagan sa kadalanan sa Lapu-Lapu, City human gilusad sa United Drivers/Operators Transport Cooperative (Udotco) sa Huwebes, Pebrero 20, ang unang batch sa airconditioned jeepneys.
Sa unang semana pa hinuon sa Marso kini moserbisyo kay gihikay pa ang ubang mga dokumento sa Land Transportation Office (LTO) 7.
Unang 20 ka units nga Euro4 kun aircon jeepneys ang gi-deliver sa Hino Motors Philippines ngadto sa Udotco nga maoy modumala sa operasyon sa transportasyon.
Gipahibawo ni Malvin Arias, chairman sa Udotco, nga susama ra og feature ang electronic jeepneys (E-Jeep) ngadto sa Euro4.
Ang nakalahi kay mogamit kini og fuel, sukwani sa E-jeep nga solar powered ug rechargeable. Ang modern jeep adunay 23 ka seating capacity, way labot sa standing.
Gawas nga bugnaw gumikan kay adunay aircon, aduna sab kini CCTV camera, global positioning system (GPS).
Tap card ang gamit sa kadtong mo-plete.
Mokabat ngadto sa P2.2 million balor matag unit sa Euro4, labaw og kapin sa P100,000 sa presyo sa E-jeepney nga ginama sa Star 8 Green Corporation.
Sumala pa ni Arias sa dihang nahinabi sa Superbalita Cebu nga ang inisyal nga rota nga subayon sa aircon jeep mao ang Marigondon via Mercado, Punta Engaño via Mercado ug Tamiya via Highway Mandaue City.
Mag-agad una ang Udotco sa desisyon sa Land Transportation Franchising and Regulatory Board (LTFRB) kon pilay regular nga pletehan sa maong matang sa jeepney ilabi na nga naggamit kini og aircon.
Ang plete sa unang lima ka kilometro P9.50. P0.90 sa mosunod na nga mga kilometro.
Gipahibawo sa opisyal nga sa 20 ka aircon jeep aduna say 20 ka mga multicab ang i-phaseout.
“Mao nya ni siya (aircon jeep) ang replacement sa mga old unit nga multicabs,” saysay ni Arias.
Nasayran nga adunay 50 ka units sa E-jeep nga gilusad niadtong administrasyon ni kanhi mayor Paz Radaza ang namasahero sa mga rota nga nagsubay sa Mactan Circumferential Highway ug ngadto sa lungsod sa Cordova.
Hayan sunod buwan makompleto na ang kinatibuk-ang 100 ka mga E-jeep diin ang uban niini padayon pang giproseso ang dokomento sa LTFRB sa dili pa hingpit maka-operate.