SA PAGLIKAY sa mga bata sa dakbayan sa sakit nga polio dunay ipahigayong pagpamakuna batok sa naasoyng sakit ang kagamhanan sa dakbayan sa Lapu-Lapu karong Sabado, Pebrero 22.
Adto kini pagahimuon sa Brgy Pajo Gym diin katambayong sa kagamhanan ang All-Terrain Medical Relief Operations (Amro).
Matod ni Lapu-Lapu City Mayor Junard “Ahong” Chan nga ang naasoyng pagpamakuna hinuon hagbay ra nga naka schedule sa wala pa mitumaw ang pagpositibo sa poliovirus sa Butuanon River sa dakbayan sa Mandaue.
Ang Brgy Pajo maoy usa sa upat ka mga barangay sa dakbayan nga kasamtangan karong gi-house to house sa mga personnel sa City Health Department ug Department of Health (DOH) alang sa info dissemination, survey ug monitoring kalabot sa poliovirus.
Ang laing upat mao ang Brgy Buaya, Pusok, Ibo ug Mactan pulos mga coastal barangay sa dakbayan.
Giklaro hinuon ni Chan nga gipasaligan siya sa DOH nga kun dili gayud direktang makakaon ug hugaw sa tawo nga nasagol sa ubang pagkaon ang usa ka bata luwas ra hinuon kini sa naasoyng sakit.
Apan dili lang buot mokompiyansa ang kagamhanan kalabot niini hinungdan nga mahinungdanon gayud ang pag-edukar sa mga nanimuyo daplin sa kadagatan kalabot sa naasoyng sakit hilabi na nga ang uban kanila pagpanginhas ang panginabuhian.
Nunot niini gipaniguro ni Chan nga ang tanang pansayan sa mga nanimuyo daplin sa dagat wala gayud sa dagat mismo.
Kon ugaling walay tarong pansayan gimandoan na usab sa kagamhanan ang mga nanimuyo daplin sa dagat nga dili ilabay ang ilang hugaw sa dagat kun di adto sa mamala.
Sa Pajo adunay gitukod ang kagamhanan nga common nga CR nga mahimong magamit sa mga molupyo daplin sa dagat.
“Anyway kaning atong buhaton nga socialize housing sa Canjulao kini sila ang priority pag transfer ngadto kay kining mga nanimuyo daplin sa dagat e-relocate gyud sila nato ngadto,” matod ni Chan.
Laing pagpamakuna unya ang ipahigayon sa kagamhanan sa mosunod mga semana human sa Pajo ug adto na usab kini sa ubang barangay nga nahimutang daplin sa dagat.
Gikatakda usab nga mamalit ang kagamhanan ug mga bakuna gumikan kay posibleng magkuwang gayud kini sa umaabot nga pagpamakuna sa kagamhanan. (GCM)