INAY mag sige og request alang sa mga ink, toners ug bag-ong printers, moabang na ang lalawigan og bag-o nga printers nga gamiton sa mga opisina.
Sugod Huwebes, Pebrero 20, 2020 mag abang na ang lalawigan sa Sugbo sa multifunctional printers sa Photopro Trading and General Merchandise Co.
Kini human nasuta ni Garcia nga nanghinubra na ang mga ekipo pag photocopy og pag print sa mga opisina.
Matod ni Gobernador Gwendolyn Garcia nga sa niining paagi mas maka daginot ang lalawigan sa gastohanan.
“Kahibaw ba mo nga di lang kana sobra-sobra diay ni sila mang request og ink, akong gipa ihap dinhi lang sa kapitolyo lang ang ink lang usa ka libo kapin mga 1,400 or 1,500 ka ink nga gipalit wala pa’y labot sa toners mga 300 kapin tagpila gud na ang usa ana. Mag stock sa kada opisina pwerteng daghana, ambot mangabli tingali og tindahan sa kadaghan namang ink”,matod ni Garcia.
Gawas sa printers nga i-provide sa maong kompanya, libre na usab ang ink og toners niini, lakip na ang maintenance sa mga ekipo.
Sa gihimong imbentaryo sa Provincial Accountant’s Office (PAO) moabot sa 653 ka mga printers og photocopiers nga magamit ang anaa sa mga opisina sa kapitolyo og Provincial og District Hospitals sa habagatan og amihanan nga bahin sa Sugbo.
Moabot 117 usab ka mga ekipo ang na lista nga wala na gamita.
Samtang may gidaghanon nga 1, 267 ka buok mga inks og 442 ka mga toners ang anaa sa mga opisina.
Matod ni Garcia nga kining tanan ipaihap pag usab og i-presenta sa Commission on Audit (COA) aron kini ma baligya.
Gilantaw ni Garcia nga minilyon ang ma daginot sa lalawigan pinaagi sa bag-o nga paagi.
Gikan sa moabot 600 ka printers, 168 na lang ka mga ordinary printers og multifunctional printers ang ma gamit sa mga opisina.
Ang matag printer abangan sa Kapitolyo og P1,088 matag buwan. (ANV)