ISIP lakang nga malikay nga adunay poliovirus sa dakbayan sa Talisay, nimando si Mayor Gerald Anthony Gullas alang sa pagpasubay kon aduna bay mga pansayan ang mga straktura diha sa daplin sa sapa sa Mananga ug Bulacao rivers.
Ang pagpahibalo ug pag-awhag sa mga ginikanan nga dad-on ang ilang mga anak sa barangay health centers aron mabakunahan batok sa polio.
“I am concerned with what happened in certain areas in the province in regards to Polio. We are all interconnected in the province so I truly believe it is better to be safe Talisaynons. I have instructed our City Health Office to accept concerns regarding Polio especially in our Health Centers in Lawaan, Cansojong, Poblacion and Lagtang,” asoy ni Gullas.
Ang Solid Waste Management Office sa Talisay, kauban ang licensing ang mohimo sugod karon, Byernes, Pebrero 21, sa ilang pag-inventory sa mga balay daplin sa sapa kon aduna bay mga pansayan ug pila kanila ang way pansayan.
Lakip na ang ubang mga estblisemento nga walay water-treatment facility.
Matud ni Gullas nga sa dihang nahibaw-an niya nga nagpositibo sa poliovirus ang Butuanon river sa dakbayan sa Mandaue, nabalaka usab siya alang sa kasapaan sa Talisay.
Gitug-an ni Lagrimas Abarquez ang pangulo sa solid waste management nga gawas sa ilang monthly clean-up drive sa kasapaan, siguruon nila unya nga mapatuman ang pag-penalty sa mga magpataka og labay diha sa sapa.
Gipaabot nalang nila nga mapasar na ang balaudnon niini diha sa konseho.
“As soon as possible mohimo mi with Licensing office sa inventory ug monitor sa mga establishments,” saysay ni Abarquez.
Si Gullas nidugang nga kon ubay-ubay gyud sa mga balay diha sa daplin sa sapa ang walay pansayan, mohimo sila og dugang communal nga pansayan.
Gipasalig usab hinuon ni Dr. Lino Alanzado ang City health officer nga aduna silay igo nga suplay sa poliovirus vaccine.
Hinuon, ang mayor ang nihangyo na sa Department of Health alang unya sa dugang vaccine kon gikinahanglan.
Buot usab sa mayor nga mapa-test ang ilang kasapaan pagsiguro nga walay poliovirus. (FMD)