Gwardiya misukol, patay sa buy bust sa Dumanjug

DRUG pusher namatay human giingong nisukol sa kapulisan atol sa buy-bust.

Si Alvin Dinopol, hingkod, taga Brgy. Lawaan, lungsod sa Dumanjug, napatay mga alas 8:20 sa gabii, sa Miyerkules, sa Brgy.Lawaan human sa giingong pinusilay tali sa kapulisan.

Si Major Ardioleto Cabagnot, hepe sa Dumanjug Police Station nga nahinabi sa Superbalita Cebu, nibutyag nga gipamusil gilayon sila ni Dinopol, dihang naabot sila sa lugar alang sa buy-bust.

Way nangaigo sa pagpamusil ug nakabawos sila ug naigo dihang mieskapo.

Nakuha sa iyang possession ang revolver ug drugas nga pinutos. Ang kaubanan ni Dinopol nakasibat sakay sa motorsiklo.

Gitug-an Ni Cabagnot nga si Dinopol, kanhi nabilanggo sa Cebu Provincial Detention and Rehabilitation Center (CPDRC) tungod sa kasong murder sa pagpatay sa habalhabal driver niadtong 2010, apan nakagawas kay wa na mopadayon ang mga kabanay sa kiha.

Nagtrabaho kini kaniadto isip security guard sa ilang dapit, apan nagpadayon sa pagmaligyag drugas ug makadaghan gialarma kay magpabuto sa armas.

“Actually amo nani siya nga gjna alarmahan perminte kay sige gapabuto pero naa na gyud ni siya sa watchlist namo ug sa BADAC sa barangay Lawaan,” butyag ni Cabagnot.

Duha nila kining gipanid-an apan wa masakpi kay di moestar sa iyang balay.

“Siguro nakahibawo na siya nga amo na siya gimonitor. Bisan ang kapitan sa ilang barangay nagproblema aning tawhana kay mag sige og pag panghadlok,” dugang ni Cabagnot. (GPL, BBT)