GIDID-AN na nga makasulod ang feeds sa mga baboy, breeder pigs, semen materials ug uban pa nga produkto sa baboy gikan sa Luzon, Mindanao, Rehiyon 7 ingon man gikan sa laing nasud nga dunay mga kaso sa African Swine Fever (ASF) sa lalawigan sa Sugbo.
Kini mao ang bag-o nga kamandoan nga giluwatan ni Gobernador Gwendolyn Garcia subay sa Administrative Circular No. 12 Series of 2019 mahitungod sa National Zoning and Movement Plan for ASF.
Ang Executive Order No. 8 nga nagsubay sa AC No. 12 nagmando sa tanan nga mga paluparan, pantalan ug uban pa nga mga agianan nga did-an na sa pag-agi o pagpalusot sa nahisgutang mga produkto.
Subay sa administrative order, may lainlain nga kolor nga gipamutang ang Department of Agriculture (DA)pag identify kon apektado sa ASF ang lugar.
Kini mao ang kolor nga puwa nga nagpasabot nga apektado ang lugar, pink o rosas.
Pasabot nga anaa sa buffer zone, yellow o dalag pasabot gipaubos sa surveillance ang lugar, light green, pasabot nga protected zone ug dark green, pasabot luwas sa sakit.
Base sa uwahing mapping nga gipakita sa DA, nalakip sa red zone ang Luzon ug Davao Region sa Mindanao.
Ang lalawigan nagpabilin sa Dark Green Zone, buot pasabot nga luwas ang Sugbo sa ASF.
Bisan pa man niini, si Dr. Mary Rose Vincoy, Provincial Veterinary Office (PVO) head, nagkanayon nga high risk gihapon ang lalawigan sa Sugbo tungod sa kadaghan nga point of entry niini ug posibleng maagian kon mopugos pagpasulod ang deliveries gikan sa mga lugar nga apektado sa ASF.
Ang lalawigan sa Sugbo may moabot sa P11 bilyones nga hog industry.
Susama sa AC nga lakip usab sa bag-o nga mando ang tulo ka components nga gidid-an pagsulod sa Sugbo.
Mao kini ang live pigs, mga genetic materials sama sa boar semen, breeder pigs ug boar.
Kon gikan kini sa Luzon, Mindanao, Rehiyon 8 ug uban pa nga lugar nga apektado sa ASF, babagan kini sa pagsulod.
Lakip na ang mga produkto nga mi-commingle.
Kinahanglan nga kompleto kini sa mga dokumento sama sa Veterinary Health Certificate, shipping permit ug certificate of laboratory nga giisyu sa Bureau of Animal Industry (BAI), Veterinary Quarantine Clearance, compliance as a breeder ug sanitary ug phytosanitary import clearance.
Sukwahi sa duha ka mga produkto, ang feeds nga gikan sa apektadong lugar, gidid-an na sa pag sulod.
nganong gilakip
Gipasabot ni Vincoy nga nalakip ang feeds tungod sa posible nga pagtakod sa kagaw pinaagi sa mga sagol niini.
“So, ang feeds apil siya although mag-range siya between moderate to low risk, pero mao bitaw na siya kay crucial ang iyang raw materials or the finish products tungod kay asa siya naggikan and even sa other countries apil gyud ni siya sa movement restriction kay pananglitan ang kaning usually ang raw material man gud ani mga soya, bean, corn, wheat, copra meal. Ug kon infected ang area pag-agi sa truck nga nakakuha og product sa affected area, posible nga ma-attach didto o maka-harbor siya og virus,” matod ni Vincoy sa Superbalita Cebu, Pebrero 20, 2020.
Epekto
Samtang si Atty. Salvador Diputado, ang pangu sa Department of Agriculture (DA) sa Rehiyon 7, nagkanayon nga dako og epekto ang pag-ban sa feeds sa mga hog producers sa Sugbo.
“Dako og impact ni sa mga hog producers kay kon dili na sila makapalit og feeds gikan sa Mindanao ug Luzon, unsa nama’y ilang ipakaon sa baboy?” matod ni Diputado pinaagi sa tawag.
“Dili ko makahatag og specific data but basically, ang atong feeds gikan na sa Luzon ug Mindanao,” matod niya.
Sa Lunes, Pebrero 24, 2020 usa ka pulong ang ipahigayon sa Kapitolyo tali ni Garcia ug sa mga feed millers nga posible nga mohatag usab sa statistical reports atol sa kalihukan.
Sa laing bahin, 23 ka mga buhing baboy nga gikan sa Sibulan, Negros Oriental gi-ship back niadtong Pebrero 19 human nipasutoy og dagan atol sa checkpoint sa gipahigayon sa ASF task force sa Bato, Oslob.
Kinse lang kabuok baboy ang nalista sa dokumento, apan sa pag-ihap sa task force 23 ka mga baboy ang nakit-an.
Padulong unta sa lungsod sa Carcar, Barili ug dakbayan sa Sugbo ang mga baboy, apan napugngan kini sa kapulisan sa lungsod sa Argao.
Pahinumdom sa PVO nga tahuron ang protocol nga gipatuman sa matag lungsod ug sigurohon nga kompleto ang mga dokumento nga dad-on atol sa pagbiyahe aron malikayan ang kakulian atol sa mga checkpoint.